fasana-e-ibrat

ta.ajjub meñ huuñ dekh kar rañg-e-ālam

ilāhī ye kyā aa gayā hai zamānā

na pahlī sī vo mehr-o-ulfat kī bāteñ

na aglā sā chāhat kā vo kār-ḳhāna

jidhar dekhiye bas ta.assub, jihālat

jahāñ jā.iye sirf laḌnā laḌānā

jo ta.alīm detā hai jañg-o-jadal kī

vo hai intihā.ī ḳhirad-mand-o-dānā

jo talqīn kartā hai sulh-o-safā kī

vo hai tīr-e-zajr-o-jafā kā nishānā

na ma.alūm kab ye jihālat miTegī

kab aa.egā aish-o-ḳhushī kā zamānā

mileñge gale kab baham milne vaale

bajā.egā iqbāl kab shādiyāna

bas ab chhoḌ do ye zideñ varna yaaro

jahāñ meñ hai mushkil tumhārā Thikānā

rahoge yūñhī pā.emāl-e-jafā tum

rahegā yahī roz ronā-rulānā

natīja ye hogā ki ban jāoge tum

fanā ho ke ik ibratoñ kā fasāna

ye sab barkateñ ahl-e-england kī haiñ

karo jald unheñ ab yahāñ se ravānā

tajjub mein hun dekh kar rang-e-alam

ilahi ye kya aa gaya hai zamana

na pahli si wo mehr-o-ulfat ki baaten

na agla sa chahat ka wo kar-KHana

jidhar dekhiye bas tassub, jihaalat

jahan jaiye sirf laDna laDana

jo talim deta hai jang-o-jadal ki

wo hai intihai KHirad-mand-o-dana

jo talqin karta hai sulh-o-safa ki

wo hai tir-e-zajr-o-jafa ka nishana

na malum kab ye jihaalat miTegi

kab aaega aish-o-KHushi ka zamana

milenge gale kab baham milne wale

bajaega iqbaal kab shadiyana

bas ab chhoD do ye ziden warna yaro

jahan mein hai mushkil tumhaara Thikana

rahoge yunhi paemal-e-jafa tum

rahega yahi roz rona-rulana

natija ye hoga ki ban jaoge tum

fana ho ke ek ibraton ka fasana

ye sab barkaten ahl-e-england ki hain

karo jald unhen ab yahan se rawana