fasil-e-shab

dāman-e-dil pe ġhubār-e-rah-e-manzil hai abhī

pā-e-afkār meñ derīna salāsil hai abhī

tīrgī sho.ala-e-ehsās kā hāsil hai abhī

raushnī qaid meñ din kaaT rahī hai ab tak

tishnagī dil kā lahū chaaT rahī hai ab tak

jo nafas hai hadaf-e-dashna-e-qātil hai abhī

dil ke har zaḳhm se ristā hai umīdoñ kā lahū

reg-zāroñ ne kiyā ḳhūn-e-bahārāñ se vuzū

jaane kis raah meñ hai qāfila-e-rang-o-numū

ek ik shāḳh shagūfoñ se hai ḳhālī ab tak

mai-kada Dhaal liyā mai nahīñ Dhālī ab tak

na kahīñ raqs-e-bahārāñ hai na jashn-e-lab-e-jū

raushnī oḌh ke zulmat kā kafan aa.ī hai

ḳhuun meñ Duub ke sūraj kī kiran aa.ī hai

zaḳhm-e-jāñ ban ke sabā sū-e-chaman aa.ī hai

lab-o-ruḳhsār-e-tamanna pe nikhār aa na sakā

ahl-e-dil ko sar-e-manzil bhī qarār aa na sakā

phir vahī rahguzar-e-dār-o-rasan aa.ī hai

phir vahī ḳhvāb-e-sahar le ke chale haiñ ham log

mash.al-e-ḳhūn-e-jigar le ke chale haiñ ham log

in añdheroñ kā bharam toḌ ke dam lenā hai

haañ fasīl-e-shab-e-ġham toḌ ke dam lenā hai

tesha-e-fikr-o-nazar le ke chale haiñ ham log

kuchh dinoñ kashmakash-e-jabr-o-sitam aur sahī

kuchh dinoñ soz-e-darūñ dīda-e-ġham aur sahī

gaam do-gām savād-e-shab-e-ġham aur sahī

sub.h-e-nau ab kisī dīvār ke ghere meñ nahīñ

ham añdhere meñ haiñ manzil to añdhere meñ nahīñ

itnī duur aa.e to do-chār qadam aur sahī

daman-e-dil pe ghubar-e-rah-e-manzil hai abhi

pa-e-afkar mein derina salasil hai abhi

tirgi shoala-e-ehsas ka hasil hai abhi

raushni qaid mein din kaT rahi hai ab tak

tishnagi dil ka lahu chaT rahi hai ab tak

jo nafas hai hadaf-e-dashna-e-qatil hai abhi

dil ke har zaKHm se rista hai umidon ka lahu

reg-zaron ne kiya KHun-e-bahaaran se wuzu

jaane kis rah mein hai qafila-e-rang-o-numu

ek ek shaKH shagufon se hai KHali ab tak

mai-kada Dhaal liya mai nahin Dhaali ab tak

na kahin raqs-e-bahaaran hai na jashn-e-lab-e-ju

raushni oDh ke zulmat ka kafan aai hai

KHun mein Dub ke suraj ki kiran aai hai

zaKHm-e-jaan ban ke saba su-e-chaman aai hai

lab-o-ruKHsar-e-tamanna pe nikhaar aa na saka

ahl-e-dil ko sar-e-manzil bhi qarar aa na saka

phir wahi rahguzar-e-dar-o-rasan aai hai

phir wahi KHwab-e-sahar le ke chale hain hum log

mashal-e-KHun-e-jigar le ke chale hain hum log

in andheron ka bharam toD ke dam lena hai

han fasil-e-shab-e-gham toD ke dam lena hai

tesha-e-fikr-o-nazar le ke chale hain hum log

kuchh dinon kashmakash-e-jabr-o-sitam aur sahi

kuchh dinon soz-e-darun dida-e-gham aur sahi

gam do-gam sawad-e-shab-e-gham aur sahi

subh-e-nau ab kisi diwar ke ghere mein nahin

hum andhere mein hain manzil to andhere mein nahin

itni dur aae to do-chaar qadam aur sahi