gharib ki duniya

zamīñ se āsmāñ tak sardiyoñ kā faiz jaarī hai

ki in ḳhāmosh rātoñ meñ musalsal barf-bārī hai

chhupe baiThe haiñ sardī se parinde āshiyānoñ meñ

jidhar dekho chhupe baiThe haiñ sab apne makānoñ meñ

havā.eñ sard chaltī haiñ fazā-e-āsmānī se

luTe haiñ nuqra.ī kohre falak kī rājdhānī se

magar is barf-bārī se hai kyā ġham māldāroñ ko

ki Dar tūfāñ se kuchh hotā nahīñ hai ābshāroñ ko

musībat kī ghaḌī kā kyā asar ho zar-parastoñ par

ki hotī hai zamīñ bhī tang aksar tang-dastoñ par

guzar-auqāt karte haiñ kabhī dīvār ke nīche

kabhī ashjār ke nīche kabhī kohsār ke nīche

ye duniyā hai amīroñ kī ġharīboñ kī nahīñ duniyā

kahīñ par kaash hotī nā-tavānoñ kī bhī ik duniyā

jahāñ par peT bharne ke liye nān-e-javīñ miltī

zarā ārām karne ke liye thoḌī zamīñ miltī

jahāñ in be-navāoñ kā bhī hamdard āsmāñ hotā

jahāñ taskīn-e-dil hotī jahāñ ārām-e-jāñ hotā

zamin se aasman tak sardiyon ka faiz jari hai

ki in KHamosh raaton mein musalsal barf-bari hai

chhupe baiThe hain sardi se parinde aashiyanon mein

jidhar dekho chhupe baiThe hain sab apne makanon mein

hawaen sard chalti hain faza-e-asmani se

luTe hain nuqrai kohre falak ki rajdhani se

magar is barf-bari se hai kya gham maldaron ko

ki Dar tufan se kuchh hota nahin hai aabshaaron ko

musibat ki ghaDi ka kya asar ho zar-paraston par

ki hoti hai zamin bhi tang aksar tang-daston par

guzar-auqat karte hain kabhi diwar ke niche

kabhi ashjar ke niche kabhi kohsar ke niche

ye duniya hai amiron ki gharibon ki nahin duniya

kahin par kash hoti na-tawanon ki bhi ek duniya

jahan par peT bharne ke liye nan-e-jawin milti

zara aaram karne ke liye thoDi zamin milti

jahan in be-nawaon ka bhi hamdard aasman hota

jahan taskin-e-dil hoti jahan aaram-e-jaan hota