garmi ki chhuTTiyan

mushkil se phir schōl na jaane ke din aa.e

be-fikrī se phir vaqt gañvāne ke din aa.e

phir raat ko chhup-chhup ke Darāne ke din aa.e

sahme hue logoñ ko banāne ke din aa.e

phir baiTh ke tabla sā bajāne ke din aa.e

phir laTe ke tanhā.ī meñ gaane ke din aa.e

har sub.h ko phir baaġh meñ jaane ke din aa.e

tū kah ke vo koyal ko chiḌhāne ke din aa.e

phir aam kā achār banāne ke din aa.e

phir chhup ke kahīñ kairiyāñ khāne ke din aa.e

kar dī thī kitāboñ ne hamārī to zabāñ band

ghar bhar meñ phir ik shor machāne ke din aa.e

vo din ga.e ḳhush rahne ko jab bhūle hue the

hañsne ke din aa.e haiñ hañsāne ke din aa.e

ab vaqt kā ronā nahīñ ab vaqt bahut hai

har kaam meñ phir der lagāne ke din aa.e

ghar par bhī the ghere hue schōl ke dhande

āzādī se ab mauj uḌāne ke din aa.e

bahnoñ ko satāyā kabhī bhaa.ī ko chiḌhāyā

laḌne ke din aa.e haiñ laḌāne ke din aa.e

phir phūloñ se ladne lagā har bele kā puurā

paudoñ meñ se phir phuul churāne ke din aa.e

khole ga.e phir gard se lipTe hue parde

dopahar ko phir raat banāne ke din aa.e

phir lūTeñge ham chāñdnī rātoñ kī bahāreñ

phir chhat pe palangoñ ke bichhāne ke din aa.e

kyoñ ab bhī pasīne meñ sharābor ho 'afsar'

nadī pe kahīñ jā ke nahāne ke din aa.e

mushkil se phir school na jaane ke din aae

be-fikri se phir waqt ganwane ke din aae

phir raat ko chhup-chhup ke Darane ke din aae

sahme hue logon ko banane ke din aae

phir baiTh ke tabla sa bajaane ke din aae

phir laTe ke tanhai mein gane ke din aae

har subh ko phir bagh mein jaane ke din aae

tu kah ke wo koyal ko chiDhane ke din aae

phir aam ka achaar banane ke din aae

phir chhup ke kahin kairiyan khane ke din aae

kar di thi kitabon ne hamari to zaban band

ghar bhar mein phir ek shor machane ke din aae

wo din gae KHush rahne ko jab bhule hue the

hansne ke din aae hain hansane ke din aae

ab waqt ka rona nahin ab waqt bahut hai

har kaam mein phir der lagane ke din aae

ghar par bhi the ghere hue school ke dhande

aazadi se ab mauj uDane ke din aae

bahnon ko sataya kabhi bhai ko chiDhaya

laDne ke din aae hain laDane ke din aae

phir phulon se ladne laga har bele ka pura

paudon mein se phir phul churane ke din aae

khole gae phir gard se lipTe hue parde

dopahar ko phir raat banane ke din aae

phir luTenge hum chandni raaton ki bahaaren

phir chhat pe palangon ke bichhane ke din aae

kyon ab bhi pasine mein sharabor ho 'afsar'

nadi pe kahin ja ke nahane ke din aae