gautam-budh

ik janāze ko uThā.e jā rahe the chand log

tum ne pūchhā kyā huā kyuuñ jā rahe ho tum malūl

tum ko logoñ ne batāyā mar gayā hai ek shaḳhs

aur yuuñ marte haiñ nādāñ huuñ ki arbāb-e-uqūl

māñgne ko chand paise peT bharne ke liye

jā rahā thā rāste se ek be-bechāra faqīr

tum ne dekhā koī us kā pūchhne vaalā nahīñ

thā maraz meñ mubtalā vo qaid-e-nik.hat kā asiir

chashm-e-haq-bīñ ke liye ibrat ke nazzāre mile

hastī-e-insān pe jo zindagānī dekh kar

aish-o-ishrat ke maze be-kār se sābit hue

naqsh-e-ālam meñ numāyāñ rañg-e-fānī dekh kar

raaj chhoḌā bādshāhat kī ummīdeñ tark kiiñ

ho gayā betāb dil rūh-e-haqīqat ke liye

chhoḌ diiñ āsā.isheñ phirte rahe tum kū-ba-kū

hastī-e-ma.abūd kī nazr-e-aqīdat ke liye

iztirābāna basar kī zindagānī muddatoñ

kulfateñ rah ke uThā.īñ mausamoñ kī shiddateñ

kī riyāzat rāt-din dil kī tasallī ke liye

jā-ba-jā phirte rahe kiiñ murshidoñ kī ḳhidmateñ

duur bastī se gayā ke ik shajar kī chhāñv meñ

tum ko bil-āḳhir sukūn-e-jāvedānī mil gayā

daf.atan chamkī haqīqat kī tajallī sāmne

mehnat-e-paiham se rāz-e-zindagānī mil gayā

ab bhī pairav haiñ tumhāre tum ho un ke devtā

ab bhī pur un kī aqīdat se tumhārā jaam hai

ye natā.ej haiñ tumhāre be-ġharaz a.amāl ke

tum nahīñ zinda magar zinda tumhārā naam hai

ek janaze ko uThae ja rahe the chand log

tum ne puchha kya hua kyun ja rahe ho tum malul

tum ko logon ne bataya mar gaya hai ek shaKHs

aur yun marte hain nadan hun ki arbab-e-uqul

mangne ko chand paise peT bharne ke liye

ja raha tha raste se ek be-bechaara faqir

tum ne dekha koi us ka puchhne wala nahin

tha maraz mein mubtala wo qaid-e-nikhat ka asir

chashm-e-haq-bin ke liye ibrat ke nazzare mile

hasti-e-insan pe jo zindagani dekh kar

aish-o-ishrat ke maze be-kar se sabit hue

naqsh-e-alam mein numayan rang-e-fani dekh kar

raj chhoDa baadshahat ki ummiden tark kin

ho gaya betab dil ruh-e-haqiqat ke liye

chhoD din aasaishen phirte rahe tum ku-ba-ku

hasti-e-mabud ki nazr-e-aqidat ke liye

iztirabana basar ki zindagani muddaton

kulfaten rah ke uThain mausamon ki shiddaten

ki riyazat raat-din dil ki tasalli ke liye

ja-ba-ja phirte rahe kin murshidon ki KHidmaten

dur basti se gaya ke ek shajar ki chhanw mein

tum ko bil-aKHir sukun-e-jawedani mil gaya

dafatan chamki haqiqat ki tajalli samne

mehnat-e-paiham se raaz-e-zindagani mil gaya

ab bhi pairaw hain tumhaare tum ho un ke dewta

ab bhi pur un ki aqidat se tumhaara jam hai

ye nataej hain tumhaare be-gharaz aamal ke

tum nahin zinda magar zinda tumhaara nam hai