gopal mittal dehli ke nam

ai hazrat-e-mittal ye karam hai ki sitam hai

kyuuñ lutf nazar aap kā nā-chīz pe kam hai

vallāh ki haiñ aap bhī ik zinda ajā.ib

sahrā meñ azaañ de ke kahāñ ho ga.e ġhā.eb

maanā ki mire shahar se dillī hai bahut duur

jaise ki rah-o-rasm-e-vafā se dil-e-maḳhmūr

ye baat kahe kaun

jañgal meñ agar bel pakā hai to chakhe kaun

sahrā meñ jo gūñjī hai vo āvāz sune kaun

jab tak nahīñ pahuñche dil-e-sāhib nazar un tak

shorīda-sarāñ tak

āvāz-e-azāñ kyā

gul-bāñg-e-fuġhāñ kyā

maiñ kaan meñ uñglī diye baiThā to nahīñ huuñ

bahrā to nahīñ huuñ

go haath meñ jumbish nahīñ āñkhoñ meñ to dam hai

phir ġhaib sabab kyuuñ

is banda-e-nāchīz pe taḳhfīf-e-karam hai

ye bhī nahīñ kahtā ki mujhe muft hī bhejeñ

taufīq ba-andāza-e-himmat kā huuñ qaa.il

maiñ aap kī derīna sharāfat kā huuñ qaa.il

har haal meñ rāzī-ba-razā huuñ

hadiya bhī adā karne se inkār nahīñ hai

aapas meñ takalluf kī dīvār nahīñ hai

phir mujh pe taġhāful kī nazar kyuuñ hai jafā kyuuñ

ye hazrat-e-'maḳhmūr'-sa.īdī kī adā hai

ai hazrat-e-mittal ye karam hai ki sitam hai

kyun lutf nazar aap ka na-chiz pe kam hai

wallah ki hain aap bhi ek zinda ajaib

sahra mein azan de ke kahan ho gae ghaeb

mana ki mere shahar se dilli hai bahut dur

jaise ki rah-o-rasm-e-wafa se dil-e-maKHmur

ye baat kahe kaun

jangal mein agar bel paka hai to chakhe kaun

sahra mein jo gunji hai wo aawaz sune kaun

jab tak nahin pahunche dil-e-sahib nazar un tak

shorida-saran tak

aawaz-e-azan kya

gul-bang-e-fughan kya

main kan mein ungli diye baiTha to nahin hun

bahra to nahin hun

go hath mein jumbish nahin aankhon mein to dam hai

phir ghaib sabab kyun

is banda-e-nachiz pe taKHfif-e-karam hai

ye bhi nahin kahta ki mujhe muft hi bhejen

taufiq ba-andaza-e-himmat ka hun qail

main aap ki derina sharafat ka hun qail

har haal mein raazi-ba-raza hun

hadiya bhi ada karne se inkar nahin hai

aapas mein takalluf ki diwar nahin hai

phir mujh pe taghaful ki nazar kyun hai jafa kyun

ye hazrat-e-'maKHmur'-saidi ki ada hai