گفتگو

کل اک بزرگوار سے کچھ بحث ہو گئی

کیا گفتگو ہوئی یہ ذرا سن لیں آپ بھی

میں نے کہا جناب سے مہنگائی ہے بہت

بولے تمہاری آمد بالائی ہے بہت

میں بولا پٹرول کی قیمت پہ کچھ کہو

کہنے لگے کہ مہنگا ہے پیدل چلا کرو

میں نے کہا کہ پیاز کا لہسن کا کیا کریں

کہنے لگے بگھار میں زیرہ لیا کریں

میں نے کہا کہ گرمی میں بجلی کا کیا کریں

کہنے لگے کہ ہاتھ سے پنکھا جھلا کریں

میں نے کہا ٹرین میں ہے بھیڑ کس قدر

بولے کہ کیوں بھٹکتے ہو ہر روز ادھر ادھر

میں نے کہا کہ کرسی کے آتے ہیں مجھ کو خواب

بولے کہ روز آیت کرسی پڑھو جناب

میں نے کہا کہ پانی کی قلت بھی ہے جناب

کہنے لگے کہ پانی کے بدلے پیو شراب

میں نے کہا کہ شاعری مجھ کو سکھائیے

بولے مشاعروں میں مرے شعر گائیے

میں نے کہا مشاعرہ لوٹیں گی شاعرات

بولے اسی لئے تو ہوئی شاعروں کو مات

میں بولا شعر میں بھی سناتا ہوں لا جواب

بولے کہ ہے تمہارا ترنم بہت خراب

میں نے کہا نہ کام ہے نے کوئی کاروبار

کہنے لگے کہ شعر کہو روز بے شمار

میں نے کہا کہ دھوپ میں گرمی میں کیا کریں

بولے کہ گھر میں بیوی کی صورت تکا کریں