gum-shuda aadmi ka intizar

lahū-nosh lamhoñ ke bedār saa.e

use gher leñge sināneñ uThā.e

tamāzat-zada shab zan-e-bākara sī

simaT jā.egī aur bhī apne tan meñ

vo sūraj kā sāthī añdheroñ ke ban meñ

asāsa liye fikr kā apne fan meñ

shuāoñ kī suulī pe zinda Tañgā hai

na ab shahr meñ koī itnā hazīñ hai

ġhazabnāk tanhā.iyoñ ko yaqīñ hai

ki us ke muqaddar meñ vo ḳhud nahīñ hai

vo ik infirādī haqīqat kā haamī

fasīloñ pe vahm-o-gumāñ kī khaḌā hai

shahr-zād shabnam se ye pūchhtā hai

ki sūraj ke siine meñ kyā kyā chhapā hai

magar shaam kī surḳh āñkhoñ ne is par

hamesha sulagtī huī raakh Daalī

tah-e-ātish-e-sruḳh-rū vo savālī

ki jis ne hathelī pe sarsoñ jamā lī

kisī devtā kī nigāh-e-ġhazab se

banā ajnabī apne ābād ghar meñ

kabhī is nagar meñ kabhī us nagar meñ

kabhī bas gayā sirf dīvār-o-dar meñ

vo ik shaḳhs tanhā ki jis kā abhī tak

safar hai musalsal na ghar mustaqil hai

faqat paas meñ us ke ma.asūm dil hai

magar kis qadar muztarib muzmahil hai

jo shahr-e-anā meñ khaḌā sochtā hai

kahāñ raat kaaTe kahāñ din bitā.e

hathelī pe duniyā kā naqsha banā.e

bhaTaktā hai vo aaj bhī choT khaa.e

are gum-shuda aadmī aa ke mil jā

are gum-shuda aadmī aa ke mil jā

lahu-nosh lamhon ke bedar sae

use gher lenge sinanen uThae

tamazat-zada shab zan-e-bakara si

simaT jaegi aur bhi apne tan mein

wo suraj ka sathi andheron ke ban mein

asasa liye fikr ka apne fan mein

shuaon ki suli pe zinda Tanga hai

na ab shahr mein koi itna hazin hai

ghazabnak tanhaiyon ko yaqin hai

ki us ke muqaddar mein wo KHud nahin hai

wo ek infiradi haqiqat ka hami

fasilon pe wahm-o-guman ki khaDa hai

shahr-zad shabnam se ye puchhta hai

ki suraj ke sine mein kya kya chhapa hai

magar sham ki surKH aankhon ne is par

hamesha sulagti hui rakh Dali

tah-e-atish-e-sruKH-ru wo sawali

ki jis ne hatheli pe sarson jama li

kisi dewta ki nigah-e-ghazab se

bana ajnabi apne aabaad ghar mein

kabhi is nagar mein kabhi us nagar mein

kabhi bas gaya sirf diwar-o-dar mein

wo ek shaKHs tanha ki jis ka abhi tak

safar hai musalsal na ghar mustaqil hai

faqat pas mein us ke masum dil hai

magar kis qadar muztarib muzmahil hai

jo shahr-e-ana mein khaDa sochta hai

kahan raat kaTe kahan din bitae

hatheli pe duniya ka naqsha banae

bhaTakta hai wo aaj bhi choT khae

are gum-shuda aadmi aa ke mil ja

are gum-shuda aadmi aa ke mil ja