habil

avvalīñ zā.iqa-e-ḳhūñ se thī lab-talḳh vo ḳhaak

jis pe maiñ TuuTī huī shāḳh ke mānind girā

kin sharāroñ kī dahak dīda-e-qābīl meñ thī

vo hasad thā ki havas taish ki nafrat kyā thā

aur phir mere badan mere lahū meñ utrā

avvalīñ be-basi-e-karb-e-fanā kā idrāk

bujh ga.ī sham-e-nazar miT ga.e āvāz ke naqsh

bū-e-gul, jū-e-sabā, najm-e-sahar kuchh na rahā

larzish-e-mauj-e-tanaffus ke karishme the tamām

rū-e-jānāñ ġham-e-jāñ dīda-e-tar kuchh na rahā

nasl-dar-nasl yūñhī mere lahū kā pyāsā

nār-e-namrūd bhī vo naḳhvat-e-fir.aun bhī vo

jām-e-zahrāb bhī vo tesha bhī vo daar bhī vo

ḳhanjar-e-shimr bhī vo tarkash-e-chañgez bhī vo

asia meñ kabhī africa meñ ḳhūñ-rez bhī vo

aur qābīl se irshād kiyā thā tū ne

ḳhūn-e-hābīl kī in zarroñ se bū aatī hai

phail kar ab vahī bū saare jahāñ par hai muhīt

kyā ye bū tā-ba-abad merā muqaddar hogī

kyā tire izn se qābīl kī ḳhū qaa.em hai

kyā ye ḳhū tā-ba-abad merā muqaddar hogī

awwalin zaiqa-e-KHun se thi lab-talKH wo KHak

jis pe main TuTi hui shaKH ke manind gira

kin shararon ki dahak dida-e-qabil mein thi

wo hasad tha ki hawas taish ki nafrat kya tha

aur phir mere badan mere lahu mein utra

awwalin be-basi-e-karb-e-fana ka idrak

bujh gai sham-e-nazar miT gae aawaz ke naqsh

bu-e-gul, ju-e-saba, najm-e-sahar kuchh na raha

larzish-e-mauj-e-tanaffus ke karishme the tamam

ru-e-jaanan gham-e-jaan dida-e-tar kuchh na raha

nasl-dar-nasl yunhi mere lahu ka pyasa

nar-e-namrud bhi wo naKHwat-e-firaun bhi wo

jam-e-zahrab bhi wo tesha bhi wo dar bhi wo

KHanjar-e-shimr bhi wo tarkash-e-changez bhi wo

asia mein kabhi africa mein KHun-rez bhi wo

aur qabil se irshad kiya tha tu ne

KHun-e-habil ki in zarron se bu aati hai

phail kar ab wahi bu sare jahan par hai muhit

kya ye bu ta-ba-abad mera muqaddar hogi

kya tere izn se qabil ki KHu qaem hai

kya ye KHu ta-ba-abad mera muqaddar hogi