haarun ki aawaz

dekho abhī hai vādī-e-kan.āñ nigāh meñ

taaza har ek naqsh-e-kaf-e-pā hai raah meñ

yāqūb be-basar sahī yūsuf kī chaah meñ

lahrā rahā hai aaj bhī turra kulāh meñ

ye turra gir gayā to ulaT jā.egī zamīñ

mahvar se apne aur bhī haT jā.egī zamīñ

tārīḳh ke safar meñ ġhalat bhī qadam uThe

gaahe libās-e-faqr meñ ahl-e-hasham uThe

gaahe sanam-tarāsh ba-nām-e-haram uThe

parde nigāh ke bhī magar besh o kam uThe

yuuñ bhī huā dahā.ī ikaa.ī meñ Dhal ga.ī

ḳhurshīd ke alaao meñ har shai pighal ga.ī

jab yuuñ na ho sakā to ye tārīḳh hai gavāh

uTThe asā-ba-dast ġhulmān-e-kaj-kulāh

zer-e-zamīñ kushāda huī zindagī kī raah

aur kuchh na kar sakī kisī fir.aun kī sipāh

har mauj-e-nīl saañp sī bal khā ke rah ga.ī

ahrām kī nigāh bhī pathrā ke rah ga.ī

azdād kī ye jañg usūl-e-qadīm hai

aur ab ki aadmī kī ikaa.ī do-nīm hai

aflāk ke tale sahī miTTī aziim hai

hārūn kī zabān bhī lauh-e-kalīm hai

had se guzar na jaa.eñ kahīñ kam-tarīn log

muusā ke intizār meñ haiñ be-zamīn log

dekho abhi hai wadi-e-kanan nigah mein

taza har ek naqsh-e-kaf-e-pa hai rah mein

yaqub be-basar sahi yusuf ki chah mein

lahra raha hai aaj bhi turra kulah mein

ye turra gir gaya to ulaT jaegi zamin

mahwar se apne aur bhi haT jaegi zamin

tariKH ke safar mein ghalat bhi qadam uThe

gahe libas-e-faqr mein ahl-e-hasham uThe

gahe sanam-tarash ba-nam-e-haram uThe

parde nigah ke bhi magar besh o kam uThe

yun bhi hua dahai ikai mein Dhal gai

KHurshid ke alao mein har shai pighal gai

jab yun na ho saka to ye tariKH hai gawah

uTThe asa-ba-dast ghulman-e-kaj-kulah

zer-e-zamin kushada hui zindagi ki rah

aur kuchh na kar saki kisi firaun ki sipah

har mauj-e-nil sanp si bal kha ke rah gai

ahram ki nigah bhi pathra ke rah gai

azdad ki ye jang usul-e-qadim hai

aur ab ki aadmi ki ikai do-nim hai

aflak ke tale sahi miTTi azim hai

haarun ki zaban bhi lauh-e-kalim hai

had se guzar na jaen kahin kam-tarin log

musa ke intizar mein hain be-zamin log