hamara jhanDa

sher haiñ chalte haiñ darrāte hue

bādaloñ kī tarah mañDlāte hue

zindagī kī rāgnī gaate hue

aaj jhanDā hai hamāre haath meñ

ham vo haiñ jo be-ruḳhī karte nahīñ

ham vo haiñ jo maut se Darte nahīñ

ham vo haiñ jo mar ke bhī marte nahīñ

aaj jhanDā hai hamāre haath meñ

chain se mahloñ meñ ham rahte nahīñ

aish kī gañgā meñ ham bahte nahīñ

bhed dushman se kabhī kahte nahīñ

aaj jhanDā hai hamāre haath meñ

jānte haiñ ek lashkar aa.egā

top dikhlā kar hameñ dhamkā.egā

par ye jhanDā bhī yūñhī lahrā.egā

aaj jhanDā hai hamāre haath meñ

kab bhalā dhamkī se ghabrāte haiñ ham

dil meñ jo hotā hai kah jaate haiñ ham

āsmāñ hiltā hai jab gaate haiñ ham

aaj jhanDā hai hamāre haath meñ

laakh lashkar aa.eñ kab hilte haiñ ham

āñdhiyoñ meñ jañg kī khilte haiñ ham

maut se hañs kar gale milte haiñ ham

aaj jhanDā hai hamāre haath meñ

sher hain chalte hain darraate hue

baadalon ki tarah manDlate hue

zindagi ki ragni gate hue

aaj jhanDa hai hamare hath mein

hum wo hain jo be-ruKHi karte nahin

hum wo hain jo maut se Darte nahin

hum wo hain jo mar ke bhi marte nahin

aaj jhanDa hai hamare hath mein

chain se mahlon mein hum rahte nahin

aish ki ganga mein hum bahte nahin

bhed dushman se kabhi kahte nahin

aaj jhanDa hai hamare hath mein

jaante hain ek lashkar aaega

top dikhla kar hamein dhamkaega

par ye jhanDa bhi yunhi lahraega

aaj jhanDa hai hamare hath mein

kab bhala dhamki se ghabraate hain hum

dil mein jo hota hai kah jate hain hum

aasman hilta hai jab gate hain hum

aaj jhanDa hai hamare hath mein

lakh lashkar aaen kab hilte hain hum

aandhiyon mein jang ki khilte hain hum

maut se hans kar gale milte hain hum

aaj jhanDa hai hamare hath mein