hilal-e-id

ai hilāl-e-īd kyoñ sūrat tirī ġhamnāk hai

kis liye zardī hai ruḳh par kyoñ garebāñ chaak hai

tere aane meñ huā kartī thī pahle ik ḳhushī

ab kī kyā dekhā hai tujh ko muztarib hai zindagī

chehra-e-zebā hai terā jāñ-sitāñ mere liye

terī nokeñ ban ga.iiñ nok-e-sināñ mere liye

aah ye ThanDī havā.eñ kis qadar haiñ ġham-fazā

mahshar-e-ġham kar diyā jis ne mire dil meñ bapā

tū hai ḳhvāhān-e-masarrat aur maiñ maġhmūm huuñ

tujh ko hāsil irtiqā hai aur maiñ mazlūm huuñ

yaad haiñ mujh ko abhī tak apnī shahbā-e-nashāt

kuuT kar qudrat ne jis meñ bhar diyā thā imbisāt

ḳhvāb sī ma.alūm hotī haiñ vo ab bāteñ mujhe

kyā mayassar ab na hoñgī aah vo rāteñ mujhe

haa.e kyā din the ki jab thiiñ ārzūeñ kāmyāb

thā kabhī ābād bhī merā dil-e-ḳhāna-ḳharāb

thā kabhī mere liye bhī vo 'arūsāna suhāg

haa.e vo ahd-e-tamannā aur javānī kā vo raag

haañ magar ai maut tū ne ghar ko vīrāñ kar diyā

ya.anī vo shīrāza-e-ishrat pareshāñ kar diyā

ab nahīñ matlab dil-e-ġhamnāk ko is iid se

mujh ko hotī thī masarrat ek un kī diid se

vo nahīñ to iid kī saarī masarrat hech hai

ġham-zada dil ke liye ye aish-o-ishrat hech hai

ab na vo josh-e-tarannum hai na haiñ vo valvale

past ho kar rah ga.e haiñ jī ke jī meñ hausle

ai hilāl-e-īd tū hai bā.is-e-ranj-o-alam

ho gayā hai taaza tere dekhne se dil kā ġham

haa.e vo din ab kahāñ jab tū nashāt-angez thā

terā har jalva nazar ko imbisāt-angez thā

terī aamad se huā kartā thā dil ko ik nashāt

haañ magar ab ke nahīñ tujh meñ vo terā imbisāt

ai hilāl-e-īd merī iid kyā dekhī nahīñ

kyā mirā ahd-e-guzishta ab nahīñ hai dil-nashīñ

kis liye hañstā hai merī bekasī par bār-bār

dekh terī chheḌ se maiñ ho na jā.ūñ ashk-bār

dil meñ hai tūfān barpā lab pe aa saktā nahīñ

kis qadar majbūr-e-ġham hai aah ye jān-e-hazīñ

maut aa jaa.e na dekho sub.h meñ is shaam kī

ai hilal-e-id kyon surat teri ghamnak hai

kis liye zardi hai ruKH par kyon gareban chaak hai

tere aane mein hua karti thi pahle ek KHushi

ab ki kya dekha hai tujh ko muztarib hai zindagi

chehra-e-zeba hai tera jaan-sitan mere liye

teri noken ban gain nok-e-sinan mere liye

aah ye ThanDi hawaen kis qadar hain gham-faza

mahshar-e-gham kar diya jis ne mere dil mein bapa

tu hai KHwahan-e-masarrat aur main maghmum hun

tujh ko hasil irtiqa hai aur main mazlum hun

yaad hain mujh ko abhi tak apni shahba-e-nashat

kuT kar qudrat ne jis mein bhar diya tha imbisat

KHwab si malum hoti hain wo ab baaten mujhe

kya mayassar ab na hongi aah wo raaten mujhe

hae kya din the ki jab thin aarzuen kaamyab

tha kabhi aabaad bhi mera dil-e-KHana-KHarab

tha kabhi mere liye bhi wo 'arusana suhag

hae wo ahd-e-tamanna aur jawani ka wo rag

han magar ai maut tu ne ghar ko viran kar diya

yani wo shiraaza-e-ishrat pareshan kar diya

ab nahin matlab dil-e-ghamnak ko is id se

mujh ko hoti thi masarrat ek un ki did se

wo nahin to id ki sari masarrat hech hai

gham-zada dil ke liye ye aish-o-ishrat hech hai

ab na wo josh-e-tarannum hai na hain wo walwale

past ho kar rah gae hain ji ke ji mein hausle

ai hilal-e-id tu hai bais-e-ranj-o-alam

ho gaya hai taza tere dekhne se dil ka gham

hae wo din ab kahan jab tu nashat-angez tha

tera har jalwa nazar ko imbisat-angez tha

teri aamad se hua karta tha dil ko ek nashat

han magar ab ke nahin tujh mein wo tera imbisat

ai hilal-e-id meri id kya dekhi nahin

kya mera ahd-e-guzishta ab nahin hai dil-nashin

kis liye hansta hai meri bekasi par bar-bar

dekh teri chheD se main ho na jaun ashk-bar

dil mein hai tufan barpa lab pe aa sakta nahin

kis qadar majbur-e-gham hai aah ye jaan-e-hazin

maut aa jae na dekho subh mein is sham ki