KHamoshi

agarche ye jahān-e-rañg-o-bū hai

magar har sū fasād-e-maiñ-o-tū hai

maiñ chup rah kar bahut kuchh kah gayā huuñ

ye ḳhāmoshī hī merī guftugū hai

tanz-o-mizāh kā yuuñ bhī karishma dikhā diyā

hans kar rulā diyā kabhī ro kar hañsā diyā

ḳhāmosh rah ke maiñ ne ka.ī baar 'ḳhvāh-maḳhvāh'

logoñ ko guftugū kā salīqa sikhā diyā

jab bhī yaad kisī kī dil meñ aatī jaatī rahtī hai

bhūlī-bisrī bātoñ kī ḳhushbū mahkātī rahtī hai

jab maazī kī āvāzeñ dīvāroñ se Takrātī haiñ

mere ghar meñ ḳhāmoshī bhī shor machātī rahtī hai

siyāhī kā bhī rañg sunahrā dekhā hai

sāhil par bhī paanī gahrā dekhā hai

jis par ḳhāmoshī kā pahra dekhā hai

maiñ ne us āvāz kā chehra dekhā hai

kabhī hamdam kabhī hamrāz huā kartī hai

kabhī monis kabhī dam-sāz huā kartī hai

dil ke kānoñ se sunoge to sunā.ī degī

ḳhāmoshī meñ bhī ik āvāz huā kartī hai

ayaañ jo ho gayā rāz-e-nihāñ ḳhamoshī kā

farefta ho saarā jahāñ ḳhamoshī kā

ḳhud apne dil kā dhḌaknā sunā.ī detā hai

ye fā.eda bhī bahut hai miyāñ ḳhamoshī kā

samajh leñ raast goī ko jo shah-zorī samajhte haiñ

vo kaisī bhī ho ham chorī ko bas chorī samajhte haiñ

buland āvāz meñ sach bolnā yuuñ bhī zarūrī hai

hamārī ḳhāmoshī ko log kamzorī samajhte haiñ

zabān yuuñ bhī kabhī āsmān hotī hai

jo muñh meñ rah ke bhī tīr-o-kamān hotī hai

ajiib tarz-e-takallum hai ḳhāmoshī kā bhī

zabān rakhte hue be-zabān hotī hai

jo shā.irī meñ vo ūñchī uḌaan rakhtā hai

to guftugū meñ bhī mīThī zabān rakhtā hai

vo 'ḳhvāh-maḳhvāh' bahut kam-suḳhan to hai lekin

ḳhamoshiyoñ meñ chhupī dāstān rakhtā hai

agarche ye jahan-e-rang-o-bu hai

magar har su fasad-e-main-o-tu hai

main chup rah kar bahut kuchh kah gaya hun

ye KHamoshi hi meri guftugu hai

tanz-o-mizah ka yun bhi karishma dikha diya

hans kar rula diya kabhi ro kar hansa diya

KHamosh rah ke main ne kai bar 'KHwah-maKHwah'

logon ko guftugu ka saliqa sikha diya

jab bhi yaad kisi ki dil mein aati jati rahti hai

bhuli-bisri baaton ki KHushbu mahkati rahti hai

jab mazi ki aawazen diwaron se Takraati hain

mere ghar mein KHamoshi bhi shor machati rahti hai

siyahi ka bhi rang sunahra dekha hai

sahil par bhi pani gahra dekha hai

jis par KHamoshi ka pahra dekha hai

main ne us aawaz ka chehra dekha hai

kabhi hamdam kabhi hamraaz hua karti hai

kabhi monis kabhi dam-saz hua karti hai

dil ke kanon se sunoge to sunai degi

KHamoshi mein bhi ek aawaz hua karti hai

ayan jo ho gaya raaz-e-nihan KHamoshi ka

farefta ho sara jahan KHamoshi ka

KHud apne dil ka dhDakna sunai deta hai

ye faeda bhi bahut hai miyan KHamoshi ka

samajh len rast goi ko jo shah-zori samajhte hain

wo kaisi bhi ho hum chori ko bas chori samajhte hain

buland aawaz mein sach bolna yun bhi zaruri hai

hamari KHamoshi ko log kamzori samajhte hain

zaban yun bhi kabhi aasman hoti hai

jo munh mein rah ke bhi tir-o-kaman hoti hai

ajib tarz-e-takallum hai KHamoshi ka bhi

zaban rakhte hue be-zaban hoti hai

jo shairi mein wo unchi uDan rakhta hai

to guftugu mein bhi miThi zaban rakhta hai

wo 'KHwah-maKHwah' bahut kam-suKHan to hai lekin

KHamoshiyon mein chhupi dastan rakhta hai