intisab

aaj ke naam

aur

aaj ke ġham ke naam

aaj kā ġham ki hai zindagī ke bhare gulsitāñ se ḳhafā

zard pattoñ kā ban

zard pattoñ kā ban jo mirā des hai

dard kī anjuman jo mirā des hai

clerkoñ kī afsurda jānoñ ke naam

kirm-ḳhurda diloñ aur zabānoñ ke naam

post-manoñ ke naam

tāñge vāloñ kā naam

rail-bānoñ ke naam

kār-ḳhānoñ ke bhūke jiyāloñ ke naam

bādshāh-e-jahāñ vālī-e-mā-sivā, nā.eb-ul-allāh fil-arz

dahqāñ ke naam

jis ke Dhoroñ ko zālim hañkā le ga.e

jis kī beTī ko Daaku uThā le ga.e

haath bhar khet se ek añgusht paTvār ne kaaT lī hai

dūsrī māliye ke bahāne se sarkār ne kaaT lī hai

jis kī pag zor vāloñ ke pāñv-tale

dhajjiyāñ ho ga.ī hai

un dukhī maaoñ ke naam

raat meñ jin ke bachche bilakte haiñ aur

niiñd kī maar khaa.e hue bāzuoñ meñ sambhalte nahīñ

dukh batāte nahīñ

minnatoñ zāriyoñ se bahalte nahīñ

un hasīnāoñ ke naam

jin kī āñkhoñ ke gul

chilmanoñ aur darīchoñ kī beloñ pe be-kār khil khil ke

murjhā ga.e haiñ

un biyāhtāoñ ke naam

jin ke badan

be mohabbat riyā-kār sejoñ pe saj saj ke uktā ga.e haiñ

bevāoñ ke naam

kaTḌiyoñ aur galiyoñ mohalloñ ke naam

jin kī nāpāk ḳhāshāk se chāñd rātoñ

ko aa aa ke kartā hai aksar vazū

jin ke sāyoñ meñ kartī hai āh-o-bukā

āñchaloñ kī hinā

chūḌiyoñ kī khanak

kākuloñ kī mahak

ārzū-mand sīnoñ kī apne pasīne meñ julne kī bū

paḌhne vāloñ ke naam

vo jo as.hāb-e-tabal-o-alam

ke daroñ par kitāb aur qalam

kā taqāzā liye haath phailā.e

vo ma.asūm jo bhole-pan meñ

vahāñ apne nanhe charāġhoñ meñ lau kī lagan

le ke pahuñche jahāñ

baT rahe the ghaTā-Top be-ant rātoñ ke saa.e

un asīroñ ke naam

jin ke sīnoñ meñ fardā ke shab-tāb gauhar

jel-ḳhānoñ kī shorīda rātoñ kī sarsar meñ

jal jal ke anjum-numā hoga.e haiñ

aane vaale dinoñ ke safīroñ ke naam

vo jo ḳhushbū-e-gul kī tarah

apne paiġhām par ḳhud fidā hoga.e haiñ

aaj ke nam

aur

aaj ke gham ke nam

aaj ka gham ki hai zindagi ke bhare gulsitan se KHafa

zard patton ka ban

zard patton ka ban jo mera des hai

dard ki anjuman jo mera des hai

clerkon ki afsurda jaanon ke nam

kirm-KHurda dilon aur zabanon ke nam

post-manon ke nam

tange walon ka nam

rail-banon ke nam

kar-KHanon ke bhuke jiyalon ke nam

baadshah-e-jahan wali-e-ma-siwa, naeb-ul-allah fil-arz

dahqan ke nam

jis ke Dhoron ko zalim hanka le gae

jis ki beTi ko Daku uTha le gae

hath bhar khet se ek angusht paTwar ne kaT li hai

dusri maliye ke bahane se sarkar ne kaT li hai

jis ki pag zor walon ke panw-tale

dhajjiyan ho gai hai

un dukhi maon ke nam

raat mein jin ke bachche bilakte hain aur

nind ki mar khae hue bazuon mein sambhalte nahin

dukh batate nahin

minnaton zariyon se bahalte nahin

un hasinaon ke nam

jin ki aankhon ke gul

chilmanon aur darichon ki belon pe be-kar khil khil ke

murjha gae hain

un biyahtaon ke nam

jin ke badan

be mohabbat riya-kar sejon pe saj saj ke ukta gae hain

bewaon ke nam

kaTDiyon aur galiyon mohallon ke nam

jin ki napak KHashak se chand raaton

ko aa aa ke karta hai aksar wazu

jin ke sayon mein karti hai aah-o-buka

aanchalon ki hina

chuDiyon ki khanak

kakulon ki mahak

aarzu-mand sinon ki apne pasine mein julne ki bu

paDhne walon ke nam

wo jo ashab-e-tabal-o-alam

ke daron par kitab aur qalam

ka taqaza liye hath phailae

wo masum jo bhole-pan mein

wahan apne nanhe charaghon mein lau ki lagan

le ke pahunche jahan

baT rahe the ghaTa-Top be-ant raaton ke sae

un asiron ke nam

jin ke sinon mein farda ke shab-tab gauhar

jel-KHanon ki shorida raaton ki sarsar mein

jal jal ke anjum-numa hogae hain

aane wale dinon ke safiron ke nam

wo jo KHushbu-e-gul ki tarah

apne paigham par KHud fida hogae hain