is gali ke moD par

is galī ke moḌ par ik aziiz dost ne

mere ashk poñchh kar

aaj mujh se ye kahā

yuuñ na dil jalāo tum

luuT maar kā hai raaj

jal rahā hai kul samāj

ye fuzūl rāgnī

mujh ko mat sunāo tum

burzhvā samāj hai

luuT maar choriyāñ is kā vasf-e-ḳhās hai

is ko mat bhulāo tum

inqalāb aa.egā

us se lau lagāo tum

ho sake to aaj kal maal kuchh banāo tum

khaa.ī se nikalne kī aarzū se pesh-tar

dekh lo zarā jo hai dūsrī taraf hai gaḌhā hai

aaj haiñ jo hukmarāñ un se baḌh ke ḳhaufnāk un ke sab raqīb haiñ

dandanā rahe haiñ jo le ke haath meñ chhurā

shukr kā maqām hai

merī masḳh laash aap ko kahīñ milī nahīñ

ik galī ke moḌ par

maiñ ne pūchhā vāqa.ī

sun ke muskurā diyā kitnī der ho ga.ī

lījiye maiñ ab chalā us ke ba.ad ab kyā huā

khaḌkhaḌā.īñ haDDiyāñ

us galī ke moḌ se vo kahīñ chalā gayā

is gali ke moD par ek aziz dost ne

mere ashk ponchh kar

aaj mujh se ye kaha

yun na dil jalao tum

luT mar ka hai raj

jal raha hai kul samaj

ye fuzul ragni

mujh ko mat sunao tum

burzhwa samaj hai

luT mar choriyan is ka wasf-e-KHas hai

is ko mat bhulao tum

inqalab aaega

us se lau lagao tum

ho sake to aaj kal mal kuchh banao tum

khai se nikalne ki aarzu se pesh-tar

dekh lo zara jo hai dusri taraf hai gaDha hai

aaj hain jo hukmaran un se baDh ke KHaufnak un ke sab raqib hain

dandana rahe hain jo le ke hath mein chhura

shukr ka maqam hai

meri masKH lash aap ko kahin mili nahin

ek gali ke moD par

main ne puchha waqai

sun ke muskura diya kitni der ho gai

lijiye main ab chala us ke baad ab kya hua

khaDkhaDain haDDiyan

us gali ke moD se wo kahin chala gaya