ishrat-e-tanhai

maiñ ki mai-ḳhāna-e-ulfat kā purānā mai-ḳhvār

mahfil-e-husn kā ik mutrib-e-shīrīñ-guftār

māh-pāroñ kā hadaf zohra-jabīnoñ kā shikār

naġhma-pairā o navāsañj o ġhazal-ḳhvāñ huuñ maiñ

kitne dil-kash mire but-ḳhān-e-īmāñ ke sanam

vo kalīsāoñ ke aahū vo gazālān-e-haram

maiñ hama-shauq-o-mohabbat vo hama-lutf-o-karam

markaz-e-marhamat-e-mahfil-e-ḳhūbāñ huuñ maiñ

maujzan hai mai-e-ishrat mire paimānoñ meñ

yaas kā dard hai kam-tar mire afsānoñ meñ

kāmrānī hai par-afshāñ mire rūmānoñ meñ

yaas kī sa.i-e-junūñ-ḳhez pe ḳhandāñ huuñ maiñ

mere afkār meñ mahtāb kī tal.at ġhaltāñ

merī guftār meñ hai sub.h kī nuzhat ġhaltāñ

mere ash.ār meñ hai phūloñ kī nik.hat ġhaltāñ

rūh-e-gulzār huuñ maiñ jān-e-gulistāñ huuñ maiñ

laakh majbūr huuñ maiñ zauq-e-ḳhud-ārā.ī se

dil hai bezār ab is ishrat-e-tanhā.ī se

aañkh majbūr nahīñ hai mirī bīnā.ī se

mahram-e-dard-o-ġham-e-ālam-e-insāñ huuñ maiñ

kyuuñ na chāhūñ ki har ik haath meñ paimāna ho

yaas o mahrūmī o majbūrī ik afsāna ho

aam ab faiz-e-mai-o-sāqī-o-mai-ḳhāna ho

riñd huuñ aur jigar-gosha-e-riñdāñ huuñ maiñ

ab ye armāñ ki badal jaa.e jahāñ kā dastūr

ek ik aañkh meñ ho aish o farāġhat kā surūr

ek ik jism pe ho atlas o kam-ḳhvāb o samor

ab ye baat aur hai ḳhud chāk-garebāñ huuñ maiñ

main ki mai-KHana-e-ulfat ka purana mai-KHwar

mahfil-e-husn ka ek mutrib-e-shirin-guftar

mah-paron ka hadaf zohra-jabinon ka shikar

naghma-paira o nawasanj o ghazal-KHwan hun main

kitne dil-kash mere but-KHan-e-iman ke sanam

wo kalisaon ke aahu wo gazalan-e-haram

main hama-shauq-o-mohabbat wo hama-lutf-o-karam

markaz-e-marhamat-e-mahfil-e-KHuban hun main

maujzan hai mai-e-ishrat mere paimanon mein

yas ka dard hai kam-tar mere afsanon mein

kaamrani hai par-afshan mere rumanon mein

yas ki sai-e-junun-KHez pe KHandan hun main

mere afkar mein mahtab ki talat ghaltan

meri guftar mein hai subh ki nuzhat ghaltan

mere ashaar mein hai phulon ki nikhat ghaltan

ruh-e-gulzar hun main jaan-e-gulistan hun main

lakh majbur hun main zauq-e-KHud-arai se

dil hai bezar ab is ishrat-e-tanhai se

aankh majbur nahin hai meri binai se

mahram-e-dard-o-gham-e-alam-e-insan hun main

kyun na chahun ki har ek hath mein paimana ho

yas o mahrumi o majburi ek afsana ho

aam ab faiz-e-mai-o-saqi-o-mai-KHana ho

rind hun aur jigar-gosha-e-rindan hun main

ab ye arman ki badal jae jahan ka dastur

ek ek aankh mein ho aish o faraghat ka surur

ek ek jism pe ho atlas o kam-KHwab o samor

ab ye baat aur hai KHud chaak-gareban hun main