ittifaqat

aaj, is sā.at-e-duzdīda-o-nāyāb meñ bhii,

jism hai ḳhvāb se lazzat-kash-e-ḳhamyāza tirā

tere mizhgāñ ke tale niiñd kī shabnam kā nuzūl

jis se Dhal jaane ko hai ġhāza tirā

zindagī tere liye ras bhare ḳhvāboñ kā hujūm

zindagī mere liye kāvish-e-bedārī hai:

ittifāqāt ko dekh

is hasīñ raat ko dekh

toḌ de vahm ke jaal

chhoḌ de apne shabistānoñ ko jaane kā ḳhayāl,

ḳhauf-e-mauhūm tirī ruuh pe kyā taarī hai!

itnā be-sarfa nahīñ terā jamāl

is junūñ-ḳhez hasīñ raat ko dekh

aaj, is sā.at-e-duzdīda-o-nāyāb meñ bhii,

tishnagī ruuh kī āsūda na ho

jab tirā jism javānī meñ hai nīsān-e-bahār

rañg-o-nik.hat kā fishār!

phuul haiñ, ghaas hai, ashjār haiñ, dīvāreñ haiñ

aur kuchh saa.e ki haiñ muḳhtasar o tīra-o-tār,

tujh ko kyā is se ġharaz hai ki ḳhudā hai ki nahīñ?

dekh pattoñ meñ laraztī huī kirnoñ kā nafūz

sarsarātī huī baḌhtī hai ragoñ meñ jaise

avvalīñ bāda-gusārī meñ na.ī tund sharāb

tujh ko kyā is se ġharaz hai ki ḳhudā hai ki nahīñ

kahkashāñ apnī tamannāoñ kā hai rāh-guzār

kaash is raah pe mil kar kabhī parvāz kareñ

ik na.ī ziist kā dar baaz kareñ!

āsmāñ duur hai lekin ye zamīñ hai nazdīk

aa isī ḳhaak ko ham jalva-gah-e-rāz kareñ!

rūheñ mil saktī nahīñ haiñ to ye lab hī mil jā.eñ,

aa isī lazzat-e-jāved kā āġhāz kareñ!

sub.h jab baaġh meñ ras lene ko zambūr aa.e

us ke bose se hoñ mad.hosh saman aur gulāb

shabnamī ghaas pe do paikar-e-yaḳh-basta mileñ,

aur ḳhudā hai to pashemāñ ho jaa.e!

aaj, is saat-e-duzdida-o-nayab mein bhi,

jism hai KHwab se lazzat-kash-e-KHamyaza tera

tere mizhgan ke tale nind ki shabnam ka nuzul

jis se Dhal jaane ko hai ghaza tera

zindagi tere liye ras bhare KHwabon ka hujum

zindagi mere liye kawish-e-bedari hai:

ittifaqat ko dekh

is hasin raat ko dekh

toD de wahm ke jal

chhoD de apne shabistanon ko jaane ka KHayal,

KHauf-e-mauhum teri ruh pe kya tari hai!

itna be-sarfa nahin tera jamal

is junun-KHez hasin raat ko dekh

aaj, is saat-e-duzdida-o-nayab mein bhi,

tishnagi ruh ki aasuda na ho

jab tera jism jawani mein hai nisan-e-bahaar

rang-o-nikhat ka fishaar!

phul hain, ghas hai, ashjar hain, diwaren hain

aur kuchh sae ki hain muKHtasar o tira-o-tar,

tujh ko kya is se gharaz hai ki KHuda hai ki nahin?

dekh patton mein larazti hui kirnon ka nafuz

sarsaraati hui baDhti hai ragon mein jaise

awwalin baada-gusari mein nai tund sharab

tujh ko kya is se gharaz hai ki KHuda hai ki nahin

kahkashan apni tamannaon ka hai rah-guzar

kash is rah pe mil kar kabhi parwaz karen

ek nai zist ka dar baz karen!

aasman dur hai lekin ye zamin hai nazdik

aa isi KHak ko hum jalwa-gah-e-raaz karen!

ruhen mil sakti nahin hain to ye lab hi mil jaen,

aa isi lazzat-e-jawed ka aaghaz karen!

subh jab bagh mein ras lene ko zambur aae

us ke bose se hon madhosh saman aur gulab

shabnami ghas pe do paikar-e-yaKH-basta milen,

aur KHuda hai to pasheman ho jae!