izhaar aur rasai

mū-qalam, saaz gul-e-tāza thirakte paañv

baat kahne ke bahāne haiñ bahut

aadmī kis se magar baat kare?

baat jab hīla-e-taqrīb-e-mulāqāt na ho

aur rasā.ī ki hamesha se hai kotāh-kamand

baat kī ġhāyat-e-ġhāyāt na ho!

ek zarra kaf-e-ḳhākistar kā

sharar-e-jasta ke mānind kabhī

kisī an-jānī tamannā kī ḳhalish se masrūr

apne siine ke dahakte hue tannūr kī lau se majbūr

ek zarra ki hamesha se hai ḳhud se mahjūr

kabhī nairañg-e-sadā ban ke jhalak uThtā hai

aab o rañg o ḳhat o mehrāb kā paivand kabhī

aur bantā hai ma.ānī kā ḳhudāvand kabhī

vo ḳhudāvand jo pā-basta-e-ānāt na ho!

isī ik zarre kī tābānī se

kisī so.e hue raqqās ke dast-o-pā meñ

kaañp uThte haiñ mah-o-sāl ke niile girdāb

isī ik zarre kī hairānī se

sher ban jaate haiñ ik kūza-gar-e-pīr ke ḳhvāb

isī ik zarra-e-lā-fānī se

ḳhisht-e-be-māya ko miltā hai davām

bām-o-dar ko vo sahar jis kī kabhī raat na ho!

aadmī kis se magar baat kare?

mū-qalam, saaz gul-e-tāza thirakte paañv

aadmī sochtā rah jaatā hai,

is qadar baar kahāñ, kis ke liye, kaise uThā.ūñ

aur phir kis ke liye baat karūñ?

mu-qalam, saz gul-e-taza thirakte panw

baat kahne ke bahane hain bahut

aadmi kis se magar baat kare?

baat jab hila-e-taqrib-e-mulaqat na ho

aur rasai ki hamesha se hai kotah-kamand

baat ki ghayat-e-ghayat na ho!

ek zarra kaf-e-KHakistar ka

sharar-e-jasta ke manind kabhi

kisi an-jaani tamanna ki KHalish se masrur

apne sine ke dahakte hue tannur ki lau se majbur

ek zarra ki hamesha se hai KHud se mahjur

kabhi nairang-e-sada ban ke jhalak uThta hai

aab o rang o KHat o mehrab ka paiwand kabhi

aur banta hai maani ka KHudawand kabhi

wo KHudawand jo pa-basta-e-anat na ho!

isi ek zarre ki tabani se

kisi soe hue raqqas ke dast-o-pa mein

kanp uThte hain mah-o-sal ke nile girdab

isi ek zarre ki hairani se

sher ban jate hain ek kuza-gar-e-pir ke KHwab

isi ek zarra-e-la-fani se

KHisht-e-be-maya ko milta hai dawam

baam-o-dar ko wo sahar jis ki kabhi raat na ho!

aadmi kis se magar baat kare?

mu-qalam, saz gul-e-taza thirakte panw

aadmi sochta rah jata hai,

is qadar bar kahan, kis ke liye, kaise uThaun

aur phir kis ke liye baat karun?