jashn-e-azadi

bhīgī āñkheñ kahīñ aur bhiñchī muTThiyāñ haiñ kahīñ

hoñT dāñtoñ tale

kuchh Tahalte hue log haiñ muztarib

kuchh ne sar donoñ hāthoñ meñ thāme hue

rishta-dāroñ kī ik bhiiḌ hai

āñkheñ suujī huī baal bikhre hue

paTTiyāñ jism ke zaḳhm Dhāñpe hue

aur nazreñ emergency kī rāhdārī meñ darvāze kī samt uTThī huī

operation ke kamre se har āte-jāte

ke chehre ko āñkhoñ ko paḌhtī huī

thak ga.e haiñ magar koī jaatā nahīñ

bhiiḌ hai aur baḌhtī huī bhiiḌ hai

āte-jāte mu'ālij ke māthe pe zholīda shiknoñ kā baḌhtā huā jaal

surḳh āñkhoñ ko kuchh aur ḳhūñ-nāb kartā

aur gahrā huā jaatā hai

jo bhī jarrāh guzre

vo dastānoñ par ḳhuuñ ke dhabbe chhupātā huā

koī jhūTī tasallī thamā kar chalā jaatā hai

bhiiḌ baḌhtī huī aur baḌhtī huī

biitī sadiyoñ ko ḳhud meñ sameTe hue

goyā muddat se sāñsoñ ko roke hue hai

harf-e-mub.ham pe harf-e-tasallī pe taaza savāloñ

kā habs-e-girāñ aur baḌh jaatā hai

sochte sochte dam nikaltā chalā jaatā hai

bhigi aankhen kahin aur bhinchi muTThiyan hain kahin

honT danton tale

kuchh Tahalte hue log hain muztarib

kuchh ne sar donon hathon mein thame hue

rishta-daron ki ek bhiD hai

aankhen suji hui baal bikhre hue

paTTiyan jism ke zaKHm Dhanpe hue

aur nazren emergency ki rahdari mein darwaze ki samt uTThi hui

operation ke kamre se har aate-jate

ke chehre ko aankhon ko paDhti hui

thak gae hain magar koi jata nahin

bhiD hai aur baDhti hui bhiD hai

aate-jate mu'alij ke mathe pe zholida shiknon ka baDhta hua jal

surKH aankhon ko kuchh aur KHun-nab karta

aur gahra hua jata hai

jo bhi jarrah guzre

wo dastanon par KHun ke dhabbe chhupata hua

koi jhuTi tasalli thama kar chala jata hai

bhiD baDhti hui aur baDhti hui

biti sadiyon ko KHud mein sameTe hue

goya muddat se sanson ko roke hue hai

harf-e-mubham pe harf-e-tasalli pe taza sawalon

ka habs-e-giran aur baDh jata hai

sochte sochte dam nikalta chala jata hai