august-1952

raushan kahīñ bahār ke imkāñ hue to haiñ

gulshan meñ chaak chand garebāñ hue to haiñ

ab bhī ḳhizāñ kā raaj hai lekin kahīñ kahīñ

goshe rah-e-chaman meñ ġhazal-ḳhvāñ hue to haiñ

Thahrī huī hai shab kī siyāhī vahīñ magar

kuch kuchh sahar ke rañg par-afshāñ hue to haiñ

in meñ lahū jalā ho hamārā ki jaan o dil

mahfil meñ kuchh charāġh farozāñ hue to haiñ

haañ kaj karo kulāh ki sab kuchh luTā ke ham

ab be-niyāz-e-gardish-e-daurāñ hue to haiñ

ahl-e-qafas kī sub.h-e-chaman meñ khulegī aañkh

bād-e-sabā se va.ada-o-paimāñ hue to haiñ

hai dasht ab bhī dasht magar ḳhūn-e-pā se 'faiz'

sairāb chand ḳhār-e-muġhīlāñ hue to haiñ

raushan kahin bahaar ke imkan hue to hain

gulshan mein chaak chand gareban hue to hain

ab bhi KHizan ka raj hai lekin kahin kahin

goshe rah-e-chaman mein ghazal-KHwan hue to hain

Thahri hui hai shab ki siyahi wahin magar

kuch kuchh sahar ke rang par-afshan hue to hain

in mein lahu jala ho hamara ki jaan o dil

mahfil mein kuchh charagh farozan hue to hain

han kaj karo kulah ki sab kuchh luTa ke hum

ab be-niyaz-e-gardish-e-dauran hue to hain

ahl-e-qafas ki subh-e-chaman mein khulegi aankh

baad-e-saba se wada-o-paiman hue to hain

hai dasht ab bhi dasht magar KHun-e-pa se 'faiz'

sairab chand KHar-e-mughilan hue to hain