ek jila-watan ki wapsi

phir ḳhabar garm hai vo jān-e-vatan aatā hai

phir vo zindānī-e-zindān-e-vatan aatā hai

vo ḳharāb-e-gul-o-raihān-e-vatan aatā hai

misr se yūsuf-e-kan.ān-e-vatan aatā hai

''koī ma.ashūq ba-sad-shaukat-o-nāz aatā hai

surḳh bairaq hai samundar meñ jahāz aatā hai''

riñd-e-be-kaif ko thī bāda-o-sāġhar kī talāsh

nāzir-e-manzar-e-fitrat ko thī manzar kī talāsh

ek bhañvre ko ḳhizāñ meñ thī gul-e-tar kī talāsh

ḳhud sanam-ḳhāna-e-āzar ko thī aazar kī talāsh

muzhda ai dost ki vo jān-e-bahār aa pahuñchā!

apne dāman meñ liye barq-o-sharār aa pahuñchā!

apnā parcham vo kuchh is andāz se lahrātā hai

rañg aġhyār ke chehroñ se uḌā jaatā hai

koī shādāñ, koī hairāñ, koī sharmātā hai

kaun ye sāhil-e-mashriq pe nazar aatā hai

apne maiḳhāne kā ik mai-kash-e-behāl hai ye

haañ vahī mard-e-javāñ-baḳht o javāñ-sāl hai ye

mard-e-sarkash tujhe aadam kī kahānī kī qasam

rūh-e-insāñ ke taqāzā-e-nihānī kī qasam

jazba-e-aish kī har shorish-e-fānī kī qasam

tujh ko apnī isī bad-mast javānī kī qasam

aa ki ik baar gale se to lagā leñ tujh ko

apne āġhosh-e-mohabbat meñ uThā leñ tujh ko

nutq to ab bhī hai par shola-fishāñ hai ki nahīñ

soz-e-pinhāñ se tirī ruuh tapāñ hai ki nahīñ

tujh pe ye baar ġhulāmī kā girāñ hai ki nahīñ

jism meñ ḳhuun javānī kā ravāñ hai ki nahīñ

aur agar hai to phir aa tere parastār haiñ ham

jins-e-āzādī-e-insāñ ke ḳharīdār haiñ ham

saaqī o rind tire haiñ mai-e-gulfām tirī

uTh ki āsūda hai phir hasrat-e-nākām tirī

barhaman tere haiñ kul millat-e-islām tirī

sub.h-e-kāshī tirī, sañgam kī hasīñ shaam tirī

dekh shamshīr hai ye saaz hai ye jaam hai ye

tū jo shamshīr uThā le to baḌā kaam hai ye

dekh badlā nazar aatā hai gulistāñ kā samāñ

sāġhar o saaz na le, jañg ke na.are haiñ yahāñ

ye duā.eñ haiñ vo mazlūm kī aahoñ kā dhuāñ

mā.il-e-jañg nazar aatā hai har mard-e-javāñ

sarfaroshān-e-balā-kash kā sahārā ban jā

uTh aur aflāk-e-baġhāvat kā sitārā ban jā

phir KHabar garm hai wo jaan-e-watan aata hai

phir wo zindani-e-zindan-e-watan aata hai

wo KHarab-e-gul-o-raihan-e-watan aata hai

misr se yusuf-e-kanan-e-watan aata hai

koi mashuq ba-sad-shaukat-o-naz aata hai

surKH bairaq hai samundar mein jahaz aata hai

rind-e-be-kaif ko thi baada-o-saghar ki talash

nazir-e-manzar-e-fitrat ko thi manzar ki talash

ek bhanwre ko KHizan mein thi gul-e-tar ki talash

KHud sanam-KHana-e-azar ko thi aazar ki talash

muzhda ai dost ki wo jaan-e-bahaar aa pahuncha!

apne daman mein liye barq-o-sharar aa pahuncha!

apna parcham wo kuchh is andaz se lahraata hai

rang aghyar ke chehron se uDa jata hai

koi shadan, koi hairan, koi sharmata hai

kaun ye sahil-e-mashriq pe nazar aata hai

apne maiKHane ka ek mai-kash-e-behaal hai ye

han wahi mard-e-jawan-baKHt o jawan-sal hai ye

mard-e-sarkash tujhe aadam ki kahani ki qasam

ruh-e-insan ke taqaza-e-nihani ki qasam

jazba-e-aish ki har shorish-e-fani ki qasam

tujh ko apni isi bad-mast jawani ki qasam

aa ki ek bar gale se to laga len tujh ko

apne aaghosh-e-mohabbat mein uTha len tujh ko

nutq to ab bhi hai par shola-fishan hai ki nahin

soz-e-pinhan se teri ruh tapan hai ki nahin

tujh pe ye bar ghulami ka giran hai ki nahin

jism mein KHun jawani ka rawan hai ki nahin

aur agar hai to phir aa tere parastar hain hum

jins-e-azadi-e-insan ke KHaridar hain hum

saqi o rind tere hain mai-e-gulfam teri

uTh ki aasuda hai phir hasrat-e-nakaam teri

barhaman tere hain kul millat-e-islam teri

subh-e-kashi tiri, sangam ki hasin sham teri

dekh shamshir hai ye saz hai ye jam hai ye

tu jo shamshir uTha le to baDa kaam hai ye

dekh badla nazar aata hai gulistan ka saman

saghar o saz na le, jang ke nare hain yahan

ye duaen hain wo mazlum ki aahon ka dhuan

mail-e-jang nazar aata hai har mard-e-jawan

sarfaroshan-e-bala-kash ka sahaara ban ja

uTh aur aflak-e-baghawat ka sitara ban ja