jhulsi si ek basti mein

haañ dekhā kal ham ne us ko dekhne kā jise armāñ thā

vo jo apne shahr se aage qarya-e-bāġh-o-bahārāñ thā

soch rahā huuñ jañg se pahle, jhulsī sī is bastī meñ

kaisā kaisā ghar kā mālik, kaisā kaisā mehmāñ thā

sab galiyoñ meñ taranjan the aur har taranjan meñ sakhiyāñ thiiñ

sab ke jī meñ aane vaalī kal kā shauq-e-farāvāñ thā

meloñ Theloñ bājoñ gājoñ bārātoñ kī dhūmeñ thiiñ

aaj koī dekhe to samjhe, ye to sadā bayābāñ thā

chāroñ jānib ThanDe chūlhe, ujḌe ujḌe āñgan haiñ

varna har ghar meñ the kamre, har kamre meñ sāmāñ thā

ujlī aur pur-nūr shabīheñ roz namāz ko aatī thiiñ

masjid ke in tāqoñ meñ bhī kyā kyā diyā farozāñ thā

ujḌī manDī, lāġhar kutte, TuuTe khambe ḳhālī khet

kyā is nahr ke pul ke aage aisā shahr-e-ḳhamoshāñ thā

aaj ki ik roTī kī ḳhātir card dikhātā phirtā hai

puure kamp ko roTī de de aisā aisā dahqāñ thā

taab nahīñ har ek se pūchheñ baabā tujh par kyā guzrī

ek ko rok ke pūchhā ham ne, siina us kā baryāñ thā

bolā log to aa.eñ jaa.eñ bastī ko phir basnā hai

mere tinkoñ kī ḳhātir aayā saarā tūfāñ thā

aag ke andar aur tapish hai, aag ke bāhar aur hī aañch

shāyad koī divānā hogā be-shak chāk-girebāñ thā

han dekha kal hum ne us ko dekhne ka jise arman tha

wo jo apne shahr se aage qarya-e-bagh-o-bahaaran tha

soch raha hun jang se pahle, jhulsi si is basti mein

kaisa kaisa ghar ka malik, kaisa kaisa mehman tha

sab galiyon mein taranjan the aur har taranjan mein sakhiyan thin

sab ke ji mein aane wali kal ka shauq-e-farawan tha

melon Thelon bajon gajon baraaton ki dhumen thin

aaj koi dekhe to samjhe, ye to sada bayaban tha

chaaron jaanib ThanDe chulhe, ujDe ujDe aangan hain

warna har ghar mein the kamre, har kamre mein saman tha

ujli aur pur-nur shabihen roz namaz ko aati thin

masjid ke in taqon mein bhi kya kya diya farozan tha

ujDi manDi, laghar kutte, TuTe khambe KHali khet

kya is nahr ke pul ke aage aisa shahr-e-KHamoshan tha

aaj ki ek roTi ki KHatir card dikhata phirta hai

pure kamp ko roTi de de aisa aisa dahqan tha

tab nahin har ek se puchhen baba tujh par kya guzri

ek ko rok ke puchha hum ne, sina us ka baryan tha

bola log to aaen jaen basti ko phir basna hai

mere tinkon ki KHatir aaya sara tufan tha

aag ke andar aur tapish hai, aag ke bahar aur hi aanch

shayad koi diwana hoga be-shak chaak-gireban tha