juz teri aankhon ke

juz tirī āñkhoñ ke kin āñkhoñ ne

lutf kā haath rakhā dard kī peshānī par

pyaar kī āñkhoñ se aañsū pochhe

narmiyāñ

lamha-e-vasl kī mānind

dil-o-jāñ meñ utartī hī chalī jaatī haiñ

hijr kī shaam hai Dhal jā.egī

vasl kā lamha gurezāñ hai pighal jā.egā

tere ruḳhsār kī dahkī huī rañgīn shafaq

aur bhī surḳh huī

tere sulge hue hoñToñ ke mahakte sho.ale

aur bhī tez hue

kab chhalak jaa.e na jaane tirī labrez vafā āñkhoñ se

mahr kī mai

kab nikal aa.e tire pyaar kā chāñd

toḌ de halqa-e-zanjīr-e-shab-o-roz

ki ye silsila-e-karb-o-alam ḳhatm to ho

aur ho jaa.e junūñ āvāra

tū mire halqa-e-āġhosh meñ aa

juz teri aankhon ke kin aankhon ne

lutf ka hath rakha dard ki peshani par

pyar ki aankhon se aansu pochhe

narmiyan

lamha-e-wasl ki manind

dil-o-jaan mein utarti hi chali jati hain

hijr ki sham hai Dhal jaegi

wasl ka lamha gurezan hai pighal jaega

tere ruKHsar ki dahki hui rangin shafaq

aur bhi surKH hui

tere sulge hue honTon ke mahakte shoale

aur bhi tez hue

kab chhalak jae na jaane teri labrez wafa aankhon se

mahr ki mai

kab nikal aae tere pyar ka chand

toD de halqa-e-zanjir-e-shab-o-roz

ki ye silsila-e-karb-o-alam KHatm to ho

aur ho jae junun aawara

tu mere halqa-e-aghosh mein aa