KHak-e-parwana

chitā ko jab tirā ThanDā badan sauñpā gayā hogā

sharāre khul ga.e hoñge dhuāñ lahrā gayā hogā

qazā ko sharm ke maare pasīna aa gayā hogā

ye manzar dekhne vāloñ se kab dekhā gayā hogā

mohabbat ke parastāroñ vafā ke sogvāroñ ne

nigāheñ pher lī hoñgī tire mātam-gusāroñ ne

nazāre shahr-o-sāhil ke pareshāñ ho ga.e hoñge

Dhalī hogī jo shām-e-ġham sitāre so ga.e hoñge

shuā.eñ bujh ga.ī hoñgī ujāle kho ga.e hoñge

tirī ThanDī chitā par shab ke saa.e ro ga.e hoñge

ugā hogā jo puurā chāñd dhabbā ban gayā hogā

siyah āñchal sā jamunā ke kināre tan gayā hogā

tamāshe zindagī-bhar tū ne soz-e-dil ke dekhe the

ġhubār-e-rahguzar meñ rāste manzil ke dekhe the

nazāre halqa-e-girdāb se sāhil ke dekhe the

tirī āñkhoñ ne jitne ḳhvāb mustaqbil ke dekhe the

na.ī paud aaj in ḳhvāboñ kī zimma-dār hotī hai

na ghabrā marne vaale zindagī bedār hotī hai

tirī fikroñ ke dhāre bah chale gang-o-jaman ban ke

tire ādarsh ne dhartī ko Dhāñkā hai gagan ban ke

tire dil ke lahū se khil ga.ī miTTī chaman ban ke

vatan kā gosha gosha muskurā uTThā dulhan ban ke

tirī sūrat kisī ko jāvedāñ hote nahīñ dekhā

kisī qatre ko itnā be-karāñ hote nahīñ dekhā

tirī guftār meñ bād-e-sabā kī gul-fishānī thī

tire afkār meñ dariyā ke paanī kī ravānī thī

tirī tahzīb ik ahd-e-mohabbat kī nishānī thī

tirī zaat ek daur-e-jehd kī zinda kahānī thī

bahut mushkil hai koī yuuñ vatan kī jaan ho jaa.e

tujhe phailā diyā jaa.e to hindostān ho jaa.e

zamīñ mātam-kada hai āsmāñ terā azā-ḳhāna

tire phūloñ se mahke dasht-o-dariyā shahr-o-vīrāna

havā meñ terī ḳhushbū pāniyoñ meñ terā afsāna

fanā ho kar fanā hotī nahīñ hai ḳhāk-e-parvāna

kiran ban kar harīm-e-vaqt kī chilman se chhantī hai

yahī miTTī simaT kar phir nayā parvāna bantī hai

chita ko jab tera ThanDa badan saunpa gaya hoga

sharare khul gae honge dhuan lahra gaya hoga

qaza ko sharm ke mare pasina aa gaya hoga

ye manzar dekhne walon se kab dekha gaya hoga

mohabbat ke parastaron wafa ke sogwaron ne

nigahen pher li hongi tere matam-gusaron ne

nazare shahr-o-sahil ke pareshan ho gae honge

Dhali hogi jo sham-e-gham sitare so gae honge

shuaen bujh gai hongi ujale kho gae honge

teri ThanDi chita par shab ke sae ro gae honge

uga hoga jo pura chand dhabba ban gaya hoga

siyah aanchal sa jamuna ke kinare tan gaya hoga

tamashe zindagi-bhar tu ne soz-e-dil ke dekhe the

ghubar-e-rahguzar mein raste manzil ke dekhe the

nazare halqa-e-girdab se sahil ke dekhe the

teri aankhon ne jitne KHwab mustaqbil ke dekhe the

nai paud aaj in KHwabon ki zimma-dar hoti hai

na ghabra marne wale zindagi bedar hoti hai

teri fikron ke dhaare bah chale gang-o-jaman ban ke

tere aadarsh ne dharti ko Dhanka hai gagan ban ke

tere dil ke lahu se khil gai miTTi chaman ban ke

watan ka gosha gosha muskura uTTha dulhan ban ke

teri surat kisi ko jawedan hote nahin dekha

kisi qatre ko itna be-karan hote nahin dekha

teri guftar mein baad-e-saba ki gul-fishani thi

tere afkar mein dariya ke pani ki rawani thi

teri tahzib ek ahd-e-mohabbat ki nishani thi

teri zat ek daur-e-jehd ki zinda kahani thi

bahut mushkil hai koi yun watan ki jaan ho jae

tujhe phaila diya jae to hindostan ho jae

zamin matam-kada hai aasman tera aza-KHana

tere phulon se mahke dasht-o-dariya shahr-o-virana

hawa mein teri KHushbu paniyon mein tera afsana

fana ho kar fana hoti nahin hai KHak-e-parwana

kiran ban kar harim-e-waqt ki chilman se chhanti hai

yahi miTTi simaT kar phir naya parwana banti hai