KHayalon ke sweater

ghaTā.eñ aaj baḌhtī jā rahī haiñ

dikhāne parbatoñ ko ro.ab apnā

havāoñ ko bhī saath apne liyā hai

khaḌe haiñ taan kar siine ko parvat

ek dūsre kā haath thāme

ki ab gherāo puurā ho gayā hai

garajne lag ga.ī hai kaalī badlī

sunahre parvatoñ ke rañg phīke paḌh ga.e haiñ

maTmailī huī jaatī hai ujlī ujlī punDir

vahīñ kuchh duur palī bastiyoñ meñ

laal piile niile ujāle ho ga.e haiñ

ki jaise kaalī kaalī chunniyoñ par

koī sitāroñ kī kaḌhā.ī kar gayā ho

darīche se maiñ baiThā dekhtā huuñ

ki duniyā shānt hotī jā rahī hai

ki jaise budh kā vardān ho ye

aur maiñ apne zehn meñ ḳhayāloñ ke sweater bun rahā huuñ

ghaTaen aaj baDhti ja rahi hain

dikhane parbaton ko roab apna

hawaon ko bhi sath apne liya hai

khaDe hain tan kar sine ko parwat

ek dusre ka hath thame

ki ab gherao pura ho gaya hai

garajne lag gai hai kali badli

sunahre parwaton ke rang phike paDh gae hain

maTmaili hui jati hai ujli ujli punDir

wahin kuchh dur pali bastiyon mein

lal pile nile ujale ho gae hain

ki jaise kali kali chunniyon par

koi sitaron ki kaDhai kar gaya ho

dariche se main baiTha dekhta hun

ki duniya shant hoti ja rahi hai

ki jaise budh ka wardan ho ye

aur main apne zehn mein KHayalon ke sweater bun raha hun