KHidmat-e-adab

jab tak adab-barā-e-adab kā rahā ḳhayāl

adbār-o-muflisī se rahe ham shikasta-hāl

saa.e kī tarah saath nahūsat lagī rahī

ik rog ban ke jaan se usrat lagī rahī

go shā.erī kā rang nikhartā chalā gayā

shīrāza-e-ma.āsh bikhartā chalā gayā

lekin ḳhudā bhalā kare ik mehrbān kā

jin ko adab-barā-e-shikam kā hai tajraba

mausūf ne batā.ī hameñ vo pate kī baat

ab din hai roz-e-īd to shab hai shab-e-barāt

all india mushā.era majlis ke naam se

kholā hai ik idāra-e-nau dhūm-dhām se

karte haiñ shā.erī ke evaz ab mushā.era

is rozgār se hai hameñ ḳhuub fā.eda

har tiin chaar maah ke vaqfe pe be-ḳhalal

apne programme pe karte haiñ ham amal

ya.anī mushā.ere kā chalāte haiñ kārobār

chhapvā ke roz-nāmoñ meñ jhūTā ye ishtihār

'josh'-o-'firāq'-o-'sāhir' o 'parvez' shāhidī

'faiz'-o-'ḳhalīl'-o-'jazbī' o 'maḳhdūm'-o-'ja.afarī'

kursī-o-arsh-o-lauh-o-qalam sab hī ā.eñge

taaza kalām apnī zabāñ se sunā.eñge

is ishtihār meñ vo kashish hai ki ahl-e-zauq

lete haiñ dāḳhle kā ticket dauḌ kar ba-shauq

circus meñ jis tarah se ho ḳhilqat kā izhdihām

yūñhī mushā.ere meñ pahuñchte haiñ ḳhās-o-ām

sab log baiTh jaate haiñ farsh-e-zamīñ pe jab

mic pe jā ke karte haiñ elaan ham ye tab

afsos hai ki aa na sake 'josh' aur 'firāq'

ye moscow ravāna hue vo ga.e iraq

'jazbī' ko iḳhtilāj hai 'parvez' haiñ aliil

gaaḌī zarā sī chuuk se miss kar ga.e 'ḳhalīl'

bhejī hai 'faiz'-o-'sāhir'-o-'maḳhdūm' ne ḳhabar

seat un ko mil sakī na havā.ī jahāz par

go ye ḳhabar diloñ ko guzartī hai nāgavār

honā hai jalsa-gāh meñ thoḌā sā intishār

le kar magar zehānat-e-fitrī se kaam ham

dam-bhar meñ sāma.īn ko karte haiñ raam ham

Dais pe tuk-faroshoñ kā rahtā hai ik hujūm

filmī dhunoñ meñ gaane kī jin ke baḌī hai dhuum

jo ḳhud ticket ḳharīd ke aate haiñ bazm meñ

ham un se apnā kaam chalāte haiñ bazm meñ

le le ke gaTkarī jo sunāte haiñ vo kalām

uḌte haiñ vaah vaah ke na.aroñ se saqf-o-bām

bazm-e-nashāt bantā hai saarā mushā.era

hotā hai kāmyāb hamārā mushā.era

ḳhush-ḳhush gharoñ ko jaate haiñ huzzār ik taraf

noToñ kā ham lagāte haiñ ambār ik taraf

ye ḳhidmat-e-adab kā tarīqa hai lā-javāb

pesha ye vo hai jis meñ munāfa hai be-hisāb

jab tak adab-bara-e-adab ka raha KHayal

adbar-o-muflisi se rahe hum shikasta-haal

sae ki tarah sath nahusat lagi rahi

ek rog ban ke jaan se usrat lagi rahi

go shaeri ka rang nikharta chala gaya

shiraaza-e-maash bikharta chala gaya

lekin KHuda bhala kare ek mehrban ka

jin ko adab-bara-e-shikam ka hai tajraba

mausuf ne batai hamein wo pate ki baat

ab din hai roz-e-id to shab hai shab-e-baraat

all india mushaera majlis ke nam se

khola hai ek idara-e-nau dhum-dham se

karte hain shaeri ke ewaz ab mushaera

is rozgar se hai hamein KHub faeda

har tin chaar mah ke waqfe pe be-KHalal

apne programme pe karte hain hum amal

yani mushaere ka chalate hain karobar

chhapwa ke roz-namon mein jhuTa ye ishtihaar

'josh'-o-'firaq'-o-'sahir' o 'parwez' shahidi

'faiz'-o-'KHalil'-o-'jazbi' o 'maKHdum'-o-'jafari'

kursi-o-arsh-o-lauh-o-qalam sab hi aaenge

taza kalam apni zaban se sunaenge

is ishtihaar mein wo kashish hai ki ahl-e-zauq

lete hain daKHle ka ticket dauD kar ba-shauq

circus mein jis tarah se ho KHilqat ka izhdiham

yunhi mushaere mein pahunchte hain KHas-o-am

sab log baiTh jate hain farsh-e-zamin pe jab

mic pe ja ke karte hain elan hum ye tab

afsos hai ki aa na sake 'josh' aur 'firaq'

ye moscow rawana hue wo gae iraq

'jazbi' ko iKHtilaj hai 'parwez' hain alil

gaDi zara si chuk se miss kar gae 'KHalil'

bheji hai 'faiz'-o-'sahir'-o-'maKHdum' ne KHabar

seat un ko mil saki na hawai jahaz par

go ye KHabar dilon ko guzarti hai nagawar

hona hai jalsa-gah mein thoDa sa intishaar

le kar magar zehanat-e-fitri se kaam hum

dam-bhar mein samain ko karte hain ram hum

Dais pe tuk-faroshon ka rahta hai ek hujum

filmi dhunon mein gane ki jin ke baDi hai dhum

jo KHud ticket KHarid ke aate hain bazm mein

hum un se apna kaam chalate hain bazm mein

le le ke gaTkari jo sunate hain wo kalam

uDte hain wah wah ke naron se saqf-o-baam

bazm-e-nashat banta hai sara mushaera

hota hai kaamyab hamara mushaera

KHush-KHush gharon ko jate hain huzzar ek taraf

noTon ka hum lagate hain ambar ek taraf

ye KHidmat-e-adab ka tariqa hai la-jawab

pesha ye wo hai jis mein munafa hai be-hisab