KHuda

kyā ḳhudā tujh ko bhuul jā.ūñ maiñ

kis liye tere gun gā.ūñ maiñ

mujh ko insāñ banā diyā tū ne

sīdhā rasta batā diyā tū ne

phir samajh dī ki nek kaam karūñ

kitnā ūñchā uThā diyā tū ne

kyā ye ehsān bhuul jā.ūñ maiñ

kis liye tere gun na gā.ūñ maiñ

chāñd sūraj jo jagmagāte haiñ

garmī aur raushnī bahāte haiñ

zindagī kā yahī sahārā haiñ

khetiyāñ bhī yahī pakāte haiñ

ye na chamkeñ to kuchh na khā.ūñ maiñ

kis liye tere gun na gā.ūñ maiñ

ye ghaTā.eñ ye ThanDī ThanDī havā

ye samundar pahāḌ ye dariyā

ye ghane aur ye lahlahāte khet

tū ne mere liye kiye paidā

den ko terī kyā ginā.ūñ maiñ

kis liye tere gun na gā.ūñ maiñ

gaay yā bhaiñs bail yā bakrī

uuñT ghoḌe pahāḌ se hāthī

duudh ghī deñ mujhe savārī deñ

joteñ bo.eñ yahī merī khetī

kyā diyā tū ne kyā batā.ūñ maiñ

kis liye terā gun na gā.ūñ maiñ

tū ne maatā pitā kā pyaar diyā

phir mujhe ilm se sañvār diyā

baḌh ke in sab se tandurustī dī

jo diyā tū ne be-shumār diyā

chāhiye sar tujhe jhukā.ūñ maiñ

kis liye tere gun na gā.ūñ maiñ

kya KHuda tujh ko bhul jaun main

kis liye tere gun gaun main

mujh ko insan bana diya tu ne

sidha rasta bata diya tu ne

phir samajh di ki nek kaam karun

kitna uncha uTha diya tu ne

kya ye ehsan bhul jaun main

kis liye tere gun na gaun main

chand suraj jo jagmagate hain

garmi aur raushni bahate hain

zindagi ka yahi sahaara hain

khetiyan bhi yahi pakate hain

ye na chamken to kuchh na khaun main

kis liye tere gun na gaun main

ye ghaTaen ye ThanDi ThanDi hawa

ye samundar pahaD ye dariya

ye ghane aur ye lahlahate khet

tu ne mere liye kiye paida

den ko teri kya ginaun main

kis liye tere gun na gaun main

gay ya bhains bail ya bakri

unT ghoDe pahaD se hathi

dudh ghi den mujhe sawari den

joten boen yahi meri kheti

kya diya tu ne kya bataun main

kis liye tera gun na gaun main

tu ne mata pita ka pyar diya

phir mujhe ilm se sanwar diya

baDh ke in sab se tandurusti di

jo diya tu ne be-shumar diya

chahiye sar tujhe jhukaun main

kis liye tere gun na gaun main