koyal

o chaman kī ajnabī chiḌiyā! kahāñ thī aah! tū

kyā kisī sahrā ke dāman meñ nihāñ thī aah! tū

tere dilkash zamzame the sabza-zāroñ meñ ḳhamosh

āshiyāna thā tirā gulshan meñ bazm-e-be-ḳharosh

khīñchtī vaqt-e-sahar dil ko tirī kū-kū na thī

chhāñv meñ tāroñ kī mahv-e-naġhma-e-dil-jū na thī

mausam-e-sarmā meñ ai sarmāya-e-sabr-o-shakeb

be-sadā terā pas-e-parda thā sāz-e-dil-fareb

marhabā ai paikar-e-paik-e-subuk-gām-e-bahār

le ke phir tū garmiyoñ meñ aa.ī paiġhām-e-bahār

tū idhar aa.ī fazā-e-gul kā daur aayā udhar

tū ne gaa.e giit aur aamoñ kā baur aayā udhar

tā.irān-e-bāġh ne chheḌā hai sāz-e-imbisāt

tere maqdam meñ hai shāḳhoñ par ham-āhang-e-nashāt

pahnī nannhī nannhī kaliyoñ ne qabā-e-shabnamīñ

aa rahī hai kaan meñ terī sadā-e-dil-nashīñ

koī anjum āsmāñ kā aur subuk parvāz-e-shauq

rahnumā hai kyā tirā dil-dāda-e-andāz-e-shauq

tū jo aane vaale mausam kā nishāñ paatī huī

apnī manzil par pahuñch jaatī hai yuuñ gaatī huī

tere maqdam meñ shakeb-e-ḳhātir-e-nā-shād maiñ

mausam-e-gul ko bhī detā huuñ mubārakbād maiñ

tū chaman meñ uḌ ke kyā aa.ī ki aa pahuñchī bahār

gā rahī haiñ chhoTī chiḌiyāñ sabz kunjoñ meñ malhār

dāman-e-rañgīñ meñ ik doshīza-e-nākat-ḳhudā

chun rahī hai nannhī nannhī surḳh kaliyāñ ḳhushnumā

aur tujh se ham-surūd-e-naġhma-e-ejāz hai

bazm-e-qudrat meñ tirī goyā sharīk-e-rāz hai

mīThe naġhme gaane vaalī o chaman kī nāznīñ

hai tar-o-tāza hamesha terā kunj-e-dil-nashīñ

aur musaffā hai fazā-e-āsmāñ tere liye

hai shafaq-jām-e-sharāb-e-arġhavāñ tere liye

tere naġhmoñ meñ asar andoh-e-hirmāñ kā nahīñ

saal meñ tere guzar fasl-e-zamistāñ kā nahīñ

mujh ko qassam-e-azal detā agar do bāl-o-par

uḌ ke hotā maiñ bhī tere saath sargarm-e-safar

ban ke ham donoñ rafīq-e-mausam-e-josh-e-bahār

karte ḳhush ḳhush har baras gul-gasht-e-dasht-o-kohsār

o chaman ki ajnabi chiDiya! kahan thi aah! tu

kya kisi sahra ke daman mein nihan thi aah! tu

tere dilkash zamzame the sabza-zaron mein KHamosh

aashiyana tha tera gulshan mein bazm-e-be-KHarosh

khinchti waqt-e-sahar dil ko teri ku-ku na thi

chhanw mein taron ki mahw-e-naghma-e-dil-ju na thi

mausam-e-sarma mein ai sarmaya-e-sabr-o-shakeb

be-sada tera pas-e-parda tha saz-e-dil-fareb

marhaba ai paikar-e-paik-e-subuk-gam-e-bahaar

le ke phir tu garmiyon mein aai paigham-e-bahaar

tu idhar aai faza-e-gul ka daur aaya udhar

tu ne gae git aur aamon ka baur aaya udhar

tairan-e-bagh ne chheDa hai saz-e-imbisat

tere maqdam mein hai shaKHon par ham-ahang-e-nashat

pahni nannhi nannhi kaliyon ne qaba-e-shabnamin

aa rahi hai kan mein teri sada-e-dil-nashin

koi anjum aasman ka aur subuk parwaz-e-shauq

rahnuma hai kya tera dil-dada-e-andaz-e-shauq

tu jo aane wale mausam ka nishan pati hui

apni manzil par pahunch jati hai yun gati hui

tere maqdam mein shakeb-e-KHatir-e-na-shad main

mausam-e-gul ko bhi deta hun mubarakbaad main

tu chaman mein uD ke kya aai ki aa pahunchi bahaar

ga rahi hain chhoTi chiDiyan sabz kunjon mein malhaar

daman-e-rangin mein ek doshiza-e-nakat-KHuda

chun rahi hai nannhi nannhi surKH kaliyan KHushnuma

aur tujh se ham-surud-e-naghma-e-ejaz hai

bazm-e-qudrat mein teri goya sharik-e-raaz hai

miThe naghme gane wali o chaman ki naznin

hai tar-o-taza hamesha tera kunj-e-dil-nashin

aur musaffa hai faza-e-asman tere liye

hai shafaq-jam-e-sharab-e-arghawan tere liye

tere naghmon mein asar andoh-e-hirman ka nahin

sal mein tere guzar fasl-e-zamistan ka nahin

mujh ko qassam-e-azal deta agar do baal-o-par

uD ke hota main bhi tere sath sargarm-e-safar

ban ke hum donon rafiq-e-mausam-e-josh-e-bahaar

karte KHush KHush har baras gul-gasht-e-dasht-o-kohsar