logo ai logo

mirī intihā-e-mohabbat masarrat sivā us ke kyā aur hogī

bajā.e koī masnad-e-āliya taḳht-e-tā.ūs-o-zar māñgne ke

bajā.e koī sar-bar-āvurda patthar-sifat shaḳhsiyat chāhne ke

tumhārī ma.iyyat rifāqat-e-tag-o-dau kā andāz māñgoñ

ye jamm-e-ġhafīr ek sail-e-ravāñ zindagī kā jolā se nikal kar

isī lā meñ phir Duub jaatā hai ye riit hai yūñhī jaarī

samundar jo phailā hai har chār-jānib ufuq se ufuq tak

samundar jo hai ā.īna-dār-e-hastī gihād-e-musalsal kashākash

samundar jo saffāk hai aur tūfāñ se labrez hai pur-junūñ hai

samundar jo bebāk hai janmdātā hai aur maut kā naġhma-e-sarmadī hai

ye sail-e-ravāñ yūñhī bahtā rahā hai isī sail meñ Duub jā.ūñ

maiñ jo ek qatra huuñ gahrā.ī gīrā.ī kā hajm kā us ke ban jā.ūñ hissa

mujhe koī muktī nahīñ chāhiye koī nirvān kī aarzū koī ḳhvāhish nahīñ ab

koī salsabīl aur kausar najāt-o-jazā pur-sukūñ koī lamha

nahīñ sirf amvāj kī shorish-e-rā.egāñ chāhiye ye agar rā.egāñ hai

meri intiha-e-mohabbat masarrat siwa us ke kya aur hogi

bajae koi masnad-e-aliya taKHt-e-taus-o-zar mangne ke

bajae koi sar-bar-awurda patthar-sifat shaKHsiyat chahne ke

tumhaari maiyyat rifaqat-e-tag-o-dau ka andaz mangon

ye jamm-e-ghafir ek sail-e-rawan zindagi ka jola se nikal kar

isi la mein phir Dub jata hai ye rit hai yunhi jari

samundar jo phaila hai har chaar-jaanib ufuq se ufuq tak

samundar jo hai aaina-dar-e-hasti gihad-e-musalsal kashakash

samundar jo saffak hai aur tufan se labrez hai pur-junun hai

samundar jo bebak hai janmdata hai aur maut ka naghma-e-sarmadi hai

ye sail-e-rawan yunhi bahta raha hai isi sail mein Dub jaun

main jo ek qatra hun gahrai girai ka hajm ka us ke ban jaun hissa

mujhe koi mukti nahin chahiye koi nirwan ki aarzu koi KHwahish nahin ab

koi salsabil aur kausar najat-o-jaza pur-sukun koi lamha

nahin sirf amwaj ki shorish-e-raegan chahiye ye agar raegan hai