mahmud-o-ayaz

jahāñ meñ bār-e-ḳhudāyā koī vakīl na ho

vakīl ho to vakālat meñ be-adīl na ho

jo be-adīl bhī ho jaa.e to jamīl na ho

jamīl ho to siyāsat meñ kuchh daḳhīl na ho

ye ḳhūbiyāñ jo ba-yak-vaqt koī paatā hai

dimāġh us kā yaqīnan ḳharāb jaatā hai

har ik ko dekhne lagtā hai vo hiqārat se

kisī se baat bhī kartā hai gar to naḳhvat se

har ik ko kartā hai mar.ūb apnī fitrat se

qadam zamīn pe rakhtā nahīñ ra.ūnat se

zamīr-e-qaisar-o-hāmān ban ke rahtā hai

vo apne ahd kā shaitān ban ke rahtā hai

kabhī kabhī use hotā hai apnī zaat pe naaz

kabhī ghamanD liyāqat pe aur sifāt pe naaz

kabhī namāziyoñ meñ saum aur salāt pe naaz

ġharaz ki us ko hai apnī har ek baat pe naaz

yahī jo haal rahā us kī ḳhud-satā.ī kā

ajab nahīñ ki vo da.avā kare ḳhudā.ī kā

aur us ke saath jo hai ik bahut baḌā vasfī

munāfiqat meñ hī jis kī tamām umr ga.ī

pa.e-numūd rahī jis ko roz bechainī

kisī ne ḳhuub kasī us ko dekh kar phabtī

ḳhudā kā shukr ki ik ahd hīlā-sāz milā

ḳhudā kā shukr ki mahmūd ko ayaaz milā

jahan mein bar-e-KHudaya koi wakil na ho

wakil ho to wakalat mein be-adil na ho

jo be-adil bhi ho jae to jamil na ho

jamil ho to siyasat mein kuchh daKHil na ho

ye KHubiyan jo ba-yak-waqt koi pata hai

dimagh us ka yaqinan KHarab jata hai

har ek ko dekhne lagta hai wo hiqarat se

kisi se baat bhi karta hai gar to naKHwat se

har ek ko karta hai marub apni fitrat se

qadam zamin pe rakhta nahin raunat se

zamir-e-qaisar-o-haman ban ke rahta hai

wo apne ahd ka shaitan ban ke rahta hai

kabhi kabhi use hota hai apni zat pe naz

kabhi ghamanD liyaqat pe aur sifat pe naz

kabhi namaziyon mein saum aur salat pe naz

gharaz ki us ko hai apni har ek baat pe naz

yahi jo haal raha us ki KHud-satai ka

ajab nahin ki wo dawa kare KHudai ka

aur us ke sath jo hai ek bahut baDa wasfi

munafiqat mein hi jis ki tamam umr gai

pae-numud rahi jis ko roz bechaini

kisi ne KHub kasi us ko dekh kar phabti

KHuda ka shukr ki ek ahd hila-saz mila

KHuda ka shukr ki mahmud ko ayaz mila