main zinda hun

āḳhirī raat thī vo

maiñ ne dil se ye kahā

harf jo likkhe ga.e

aur jo zabāñ bolī ga.ī

sabhī be-kār ga.e

maiñ bhī ab haar gayā yaar bhī sab haar ga.e

koī chāra nahīñ juz-tark-e-ta.alluq ai dil

ik sadā aur sahī āḳhirī baar

jism se chheḌā use ruuh se chhū le use

āḳhirī baar bahe sāz-e-badan se koī naġhma koī lai

āḳhirī raat hai ye

āḳhirī baar hai ye zā.iqa-e-bosa-o-lams

āḳhirī baar chhalak jaa.e lahū

garmi-e-jāñ se mahak jaa.e nafas kī ḳhushbū

ḳhvāb meñ ḳhvāb ke mānind utar jā ai dil

āḳhirī raat thī vo

phir guzar kū-e-nadāmat se huā to dekhā

baam raushan hai jo thā

aur darvāze pe dastak hai vahī

merā qātil dar-o-dīvār pe kuchh naqsh banātā hai abhī

uñgliyāñ ḳhuun se tar dil-e-kam-zarf ko hai vāhama-e-arz-e-hunar

din kī har baat huī be-tauqīr

raat hai aur zamīr

chashm hai muntazir-e-ḳhvāb-e-digar

ḳhvāb aate haiñ Thaharte haiñ chale jaate haiñ

aur qātil kī sazā ye bhī ki maiñ zinda huuñ

aaKHiri raat thi wo

main ne dil se ye kaha

harf jo likkhe gae

aur jo zaban boli gai

sabhi be-kar gae

main bhi ab haar gaya yar bhi sab haar gae

koi chaara nahin juz-tark-e-talluq ai dil

ek sada aur sahi aaKHiri bar

jism se chheDa use ruh se chhu le use

aaKHiri bar bahe saz-e-badan se koi naghma koi lai

aaKHiri raat hai ye

aaKHiri bar hai ye zaiqa-e-bosa-o-lams

aaKHiri bar chhalak jae lahu

garmi-e-jaan se mahak jae nafas ki KHushbu

KHwab mein KHwab ke manind utar ja ai dil

aaKHiri raat thi wo

phir guzar ku-e-nadamat se hua to dekha

baam raushan hai jo tha

aur darwaze pe dastak hai wahi

mera qatil dar-o-diwar pe kuchh naqsh banata hai abhi

ungliyan KHun se tar dil-e-kam-zarf ko hai wahama-e-arz-e-hunar

din ki har baat hui be-tauqir

raat hai aur zamir

chashm hai muntazir-e-KHwab-e-digar

KHwab aate hain Thaharte hain chale jate hain

aur qatil ki saza ye bhi ki main zinda hun