mann-o-salwa

''ḳhudā-e-bartar

ye dariyūsh-e-buzurg kī sarzamīñ

ye nau-shervān-e-ādil kī dād-gāheñ

tasavvuf o hikmat o adab ke nigār-ḳhāne

ye kyuuñ siyah-post dushmanoñ ke vajūd se

aaj phir ubalte hue se nāsūr ban rahe haiñ?''

ham is ke mujrim nahīñ haiñ jān-e-ajam nahīñ haiñ

vo pahlā añgrez

jis ne hindostāñ ke sāhil pe

lā ke rakkhī thī jins-e-saudā-garī

ye us kā gunāh hai

jo tire vatan kī

zamīn-e-gul-posh ko

ham apne siyāh qadmoñ se rauñdte haiñ!

ye shahr apnā vatan nahīñ hai

magar farañgī kī rahzanī ne

isī se nā-chār ham ko vābasta kar diyā hai

ham is kī tahzīb kī bulandī kī chhipkilī ban ke rah ga.e haiñ

vo rāhzan jo ye sochtā hai

''ki asia hai koī aqiim o amiir beva

jo apnī daulat kī be-panāhī se mubtalā ik fishār meñ hai

aur us kā āġhosh-e-ārzū-mand vā mire intizār meñ hai

aur eshiyā.ī

qadīm ḳhvāja-sarāoñ kī ik nazhād-e-kāhil

ajal kī rāhoñ pe tez-gāmī se jā rahe haiñ''

magar ye hindī

gurisna o pā-barahna hindī

jo sālik-e-rāh haiñ

magar rāh-o-rasm-e-manzil se be-ḳhabar haiñ

gharoñ ko vīrān kar ke

lākhoñ sa.ūbateñ sah ke

aur apnā lahū bahā kar

agar kabhī sochte haiñ kuchh to yahī

ki shāyad unhī ke baazū

najāt dilvā sakeñge mashriq ko

ġhair ke be-panāh biphre hue sitam se

ye sochte haiñ:

ye hādsa hī ki jis ne pheñkā hai

lā ke un ko tire vatan meñ

vo aañch ban jaa.e

jis se phuñk jaa.e

vo jarāsīm kā akhāḌā

jahāñ se har baar jañg kī bū-e-tund uThtī hai

aur duniyā meñ phailtī hai!

maiñ jāntā huuñ

mire bahut se rafīq

apnī udaas be-kār zindagī ke

darāz o tārīk fāsloñ meñ

kabhī kabhī bheḌiyoñ ke mānind

aa nikalte haiñ rahguzāroñ pe

justujū meñ kasī ke do ''sāq-e-sandalīñ'' kī

kabhī darīchoñ kī oT meñ

nā-tavāñ patiñgoñ kī phaḌphaḌāhaT pe

hosh se be-niyāz ho kar vo TūTte haiñ

vo dast-e-sā.il

jo sāmne un ke phailtā hai

is aarzū meñ

ki un kī baḳhshish se

pāra-e-nān mann-o-salvā kā ruup bhar le

vahī kabhī apnī nāzukī se

vo rah sujhātā hai

jis kī manzil pe shauq kī tishnagī nahīñ hai!

tū in manāzir ko dekhtī hai!

tū sochtī hai:

ye sañg-dil apnī buz-dilī se

firañgiyoñ kī mohabbat-e-nā-ravāñ kī zanjīr meñ bañdhe haiñ

inhī ke dam se ye shahr ubaltā huā sā nāsūr ban rahā hai!

mohabbat-e-nāravā nahīñ hai

bas ek zanjīr

ek hī āhanī kamand-e-azīm

phailī huī hai

mashriq ke ik kināre se dūsre tak

mire vatan se tire vatan tak

bas ek hī ankabūt kā jaal hai ki jis meñ

ham eshiyā.ī asiir ho kar taḌap rahe haiñ

muġhūl kī sub.h-e-ḳhūñ-fishāñ se

farañg kī shām-e-jāñ-sitāñ tak!

taḌap rahe haiñ

bas ek hī dard-e-lā-davā meñ

aur apne ālām-e-jāñ-guzā ke

is ishtirāk-e-girāñ-bahā ne bhī

ham ko ik dūsre se ab tak

qarīb hone nahīñ diyā hai!

KHuda-e-bartar

ye dariyush-e-buzurg ki sarzamin

ye nau-sherwan-e-adil ki dad-gahen

tasawwuf o hikmat o adab ke nigar-KHane

ye kyun siyah-post dushmanon ke wajud se

aaj phir ubalte hue se nasur ban rahe hain?

hum is ke mujrim nahin hain jaan-e-ajam nahin hain

wo pahla angrez

jis ne hindostan ke sahil pe

la ke rakkhi thi jins-e-sauda-gari

ye us ka gunah hai

jo tere watan ki

zamin-e-gul-posh ko

hum apne siyah qadmon se raundte hain!

ye shahr apna watan nahin hai

magar farangi ki rahzani ne

isi se na-chaar hum ko wabasta kar diya hai

hum is ki tahzib ki bulandi ki chhipkili ban ke rah gae hain

wo rahzan jo ye sochta hai

ki asia hai koi aqim o amir bewa

jo apni daulat ki be-panahi se mubtala ek fishaar mein hai

aur us ka aaghosh-e-arzu-mand wa mere intizar mein hai

aur eshiyai

qadim KHwaja-saraon ki ek nazhad-e-kahil

ajal ki rahon pe tez-gami se ja rahe hain

magar ye hindi

gurisna o pa-barahna hindi

jo salik-e-rah hain

magar rah-o-rasm-e-manzil se be-KHabar hain

gharon ko viran kar ke

lakhon saubaten sah ke

aur apna lahu baha kar

agar kabhi sochte hain kuchh to yahi

ki shayad unhi ke bazu

najat dilwa sakenge mashriq ko

ghair ke be-panah biphre hue sitam se

ye sochte hain:

ye hadsa hi ki jis ne phenka hai

la ke un ko tere watan mein

wo aanch ban jae

jis se phunk jae

wo jarasim ka akhaDa

jahan se har bar jang ki bu-e-tund uThti hai

aur duniya mein phailti hai!

main jaanta hun

mere bahut se rafiq

apni udas be-kar zindagi ke

daraaz o tarik faslon mein

kabhi kabhi bheDiyon ke manind

aa nikalte hain rahguzaron pe

justuju mein kasi ke do saq-e-sandalin ki

kabhi darichon ki oT mein

na-tawan patingon ki phaDphaDahaT pe

hosh se be-niyaz ho kar wo TuTte hain

wo dast-e-sail

jo samne un ke phailta hai

is aarzu mein

ki un ki baKHshish se

para-e-nan mann-o-salwa ka rup bhar le

wahi kabhi apni nazuki se

wo rah sujhata hai

jis ki manzil pe shauq ki tishnagi nahin hai!

tu in manazir ko dekhti hai!

tu sochti hai:

ye sang-dil apni buz-dili se

firangiyon ki mohabbat-e-na-rawan ki zanjir mein bandhe hain

inhi ke dam se ye shahr ubalta hua sa nasur ban raha hai!

mohabbat-e-narawa nahin hai

bas ek zanjir

ek hi aahani kamand-e-azim

phaili hui hai

mashriq ke ek kinare se dusre tak

mere watan se tere watan tak

bas ek hi ankabut ka jal hai ki jis mein

hum eshiyai asir ho kar taDap rahe hain

mughul ki subh-e-KHun-fishan se

farang ki sham-e-jaan-sitan tak!

taDap rahe hain

bas ek hi dard-e-la-dawa mein

aur apne aalam-e-jaan-guza ke

is ishtirak-e-giran-baha ne bhi

hum ko ek dusre se ab tak

qarib hone nahin diya hai!