manon ret tale

maiñ jo soī huuñ manoñ ret tale

kaash tū jaan sake shaam Dhale

merī āñkheñ tirī aahaT pe lagī rahtī haiñ

merā āñchal merī tarsī huī be-kal hastī

merī mamtā tirī rāhoñ meñ bichhī rahtī hai

maiñ bahut ḳhush huuñ tujhe dekh ke ai dil ke qarār

tere chehre kī chamak aaj bhī tābinda hai

tere lahje meñ mirā aks abhī zinda hai

maiñ jo soī huuñ manoñ ret tale

aaj tū ne jo mujhe phūloñ kī chādar dī hai

merī tarsī huī duniyā meñ bahār aa.ī hai

shaam mahkī hai mo.attar sī ghaTā chhā.ī hai

kaash tū jaan sake ai mire dil ke TukḌe

maiñ jo soī huuñ manoñ ret tale

tujh pe ab qarz hai in zaḳhmoñ ko sahlāne kā

merī nākām umangoñ kā akelā āñgan

tujh se bahlegā nahīñ aur koī aane kā

merī āñkhoñ ke diye merī vafāoñ kā sahar

tujh ko har baar mire paas liye aa.egā

saarī duniyā tujhe jānegī mire hone se

merā partav tirī hastī meñ utar jā.egā

kaash tū jaan bhī le ai mire dil ke TukḌe

maiñ jo soī huuñ manoñ ret tale

main jo soi hun manon ret tale

kash tu jaan sake sham Dhale

meri aankhen teri aahaT pe lagi rahti hain

mera aanchal meri tarsi hui be-kal hasti

meri mamta teri rahon mein bichhi rahti hai

main bahut KHush hun tujhe dekh ke ai dil ke qarar

tere chehre ki chamak aaj bhi tabinda hai

tere lahje mein mera aks abhi zinda hai

main jo soi hun manon ret tale

aaj tu ne jo mujhe phulon ki chadar di hai

meri tarsi hui duniya mein bahaar aai hai

sham mahki hai moattar si ghaTa chhai hai

kash tu jaan sake ai mere dil ke TukDe

main jo soi hun manon ret tale

tujh pe ab qarz hai in zaKHmon ko sahlane ka

meri nakaam umangon ka akela aangan

tujh se bahlega nahin aur koi aane ka

meri aankhon ke diye meri wafaon ka sahar

tujh ko har bar mere pas liye aaega

sari duniya tujhe jaanegi mere hone se

mera partaw teri hasti mein utar jaega

kash tu jaan bhi le ai mere dil ke TukDe

main jo soi hun manon ret tale