mat qatl karo aawazon ko

tum apne aqīdoñ ke neze

har dil meñ utāre jaate ho

ham log mohabbat vaale haiñ

tum ḳhanjar kyuuñ lahrāte ho

is shahr meñ naġhme bahne do

bastī meñ hameñ bhī rahne do

ham pālanhār haiñ phūloñ ke

ham ḳhushbū ke rakhvāle haiñ

tum kis kā lahū piine aa.e

ham pyaar sikhāne vaale haiñ

is shahr meñ phir kyā dekhoge

jab harf yahāñ mar jā.egā

jab teġh pe lai kaT jā.egī

jab sher safar kar jā.egā

jab qatl huā sur sāzoñ kā

jab kaal paḌā āvāzoñ kā

jab shahr khañDar ban jā.egā

phir kis par sañg uThāoge

apne chehre ā.īnoñ meñ

jab dekhoge Dar jāoge

tum apne aqidon ke neze

har dil mein utare jate ho

hum log mohabbat wale hain

tum KHanjar kyun lahraate ho

is shahr mein naghme bahne do

basti mein hamein bhi rahne do

hum palanhaar hain phulon ke

hum KHushbu ke rakhwale hain

tum kis ka lahu pine aae

hum pyar sikhane wale hain

is shahr mein phir kya dekhoge

jab harf yahan mar jaega

jab tegh pe lai kaT jaegi

jab sher safar kar jaega

jab qatl hua sur sazon ka

jab kal paDa aawazon ka

jab shahr khanDar ban jaega

phir kis par sang uThaoge

apne chehre aainon mein

jab dekhoge Dar jaoge