mazdur

hai tere sar pe qanā.at kā taaj ai mazdūr

ki tere sāmne hotā hai ḳham sar-e-maġhrūr

har ek saañs hai terī shikast kī āvāz

tire sukūn meñ lekin haiñ fat.h ke andāz

hai tere rang meñ pazhmurda hasratoñ kā hujūm

magar kisī ne bhī dekhā nahīñ tujhe maġhmūm

tire aqīde meñ ġhaflat hai ik gunāh-e-azīm

tujhe jagānī hai sūraj ke saath mauj-e-nasīm

hujūm-e-ranj-o-alam meñ bhī terā dil hai javāñ

subuk bahāo pe dariyā ke jis tarah ho chaTāñ

hai sar pe Tokrā lohe kā haath meñ hai kudāl

baġhal meñ phāvDā aur dil meñ apne ghar kā ḳhayāl

lageñ jo haath tire jhoñpaḌā bhī aivāñ ho

tire qadam jo paḌeñ dasht bhī gulistāñ ho

libās-e-dahr haiñ tere libās ke paivand

ḳhudā gavāh hai sarmāya-dār kī saugand

hai tere haal pe betāb jazba-e-insāf

nigāh-e-dīdā-e-haq kar rahī hai terā tavāf

nahīñ hai tere taḳhayyul meñ fitna-e-tahqīq

haiñ tere jahl pe qurbān nukta-hā-e-daqīq

fareb makr daġhā jang zar-garī takzīb

tire junūñ ko nahīñ chheḌtī na.ī tahzīb

tirī adā hai purānī ḳhayāl farsūda

magar nahīñ hai tirā dil gunāh ālūda

tujhe haqīr samajhtā hai zar-parast jalāl

jahān-e-jabr-o-tashaddud maqām-e-jang-o-qitāl

kise sunā.ūñ tirī dāstān-e-barbādī

kise kahūñ ki hai terā sukūt fariyādī

kise dikhā.ūñ ki hai ḳhuuñ tire pasīne meñ

kise batā.ūñ ki haiñ daaġh tere siine meñ

haqāratoñ se na ghabrā shaqāvatoñ se na Dar

ki kor-chashmoñ ko hotī nahīñ tamīz-e-nazar

hai tere haath meñ āzāda-kāriyoñ kī lagām

tujhe ġhulām jo kah de vo laakh baar ġhulām

hai tere sar pe qanaat ka taj ai mazdur

ki tere samne hota hai KHam sar-e-maghrur

har ek sans hai teri shikast ki aawaz

tere sukun mein lekin hain fath ke andaz

hai tere rang mein pazhmurda hasraton ka hujum

magar kisi ne bhi dekha nahin tujhe maghmum

tere aqide mein ghaflat hai ek gunah-e-azim

tujhe jagani hai suraj ke sath mauj-e-nasim

hujum-e-ranj-o-alam mein bhi tera dil hai jawan

subuk bahao pe dariya ke jis tarah ho chaTan

hai sar pe Tokra lohe ka hath mein hai kudal

baghal mein phawDa aur dil mein apne ghar ka KHayal

lagen jo hath tere jhonpaDa bhi aiwan ho

tere qadam jo paDen dasht bhi gulistan ho

libas-e-dahr hain tere libas ke paiwand

KHuda gawah hai sarmaya-dar ki saugand

hai tere haal pe betab jazba-e-insaf

nigah-e-dida-e-haq kar rahi hai tera tawaf

nahin hai tere taKHayyul mein fitna-e-tahqiq

hain tere jahl pe qurban nukta-ha-e-daqiq

fareb makr dagha jang zar-gari takzib

tere junun ko nahin chheDti nai tahzib

teri ada hai purani KHayal farsuda

magar nahin hai tera dil gunah aaluda

tujhe haqir samajhta hai zar-parast jalal

jahan-e-jabr-o-tashaddud maqam-e-jang-o-qital

kise sunaun teri dastan-e-barbaadi

kise kahun ki hai tera sukut fariyaadi

kise dikhaun ki hai KHun tere pasine mein

kise bataun ki hain dagh tere sine mein

haqaraton se na ghabra shaqawaton se na Dar

ki kor-chashmon ko hoti nahin tamiz-e-nazar

hai tere hath mein aazada-kariyon ki lagam

tujhe ghulam jo kah de wo lakh bar ghulam