mere bhi hain kuchh KHwab

ai ishq-e-azal-gīr o abad-tāb mere bhī haiñ kuchh ḳhvāb

mere bhī haiñ kuchh ḳhvāb

us daur se is daur ke sūkhe hue dariyāoñ se

phaile hue sahrāoñ se aur shahroñ ke vīrānoñ se

vīrāna-garoñ se maiñ hazīñ aur udās!

ai ishq-e-azal-gīr o abad-tāb

mere bhī haiñ kuchh ḳhvāb!

ai ishq-e-azal-gīr o abad-tāb mere bhī haiñ kuchh ḳhvāb

mere bhī haiñ kuchh ḳhvāb

vo ḳhvāb ki asrār nahīñ jin ke hameñ aaj bhī ma.alūm

vo ḳhvāb jo āsūdgī-e-martaba-o-jāh se

ālūdgī-e-gard-e-sar-e-rāh se ma.asūm

jo ziist kī be-hūda kashākash se bhī hote nahīñ ma.adūm

ḳhud ziist kā mafhūm!

ai ishq-e-azal-gīr o abad-tāb

ai kāhin-e-dānish-var o a.ālī-guhar o piir

tū ne hī batā.ī hameñ har ḳhvāb kī ta.abīr

tuune hī sujhā.ī ġham-e-dil-gīr kī tasḳhīr

TuuTī tire hāthoñ hī se har ḳhauf kī zanjīr

ai ishq-e-azal-gīr o abad-tāb, mere bhī haiñ kuchh ḳhvāb

mere bhī haiñ kuchh ḳhvāb

ai ishq-e-azal-gīr o abad-tāb

kuchh ḳhvāb ki madfūn haiñ ajdād ke ḳhud-sāḳhta asmār ke nīche

ujḌe hue maz.hab ke banā reḳhta auhām kī dīvār ke nīche

shīrāz ke majzūb-e-tunak-jām ke afkār ke nīche

tahzīb-e-nigūñ-sār ke ālām ke ambār ke nīche

kuchh ḳhvāb haiñ āzād magar baḌhte hue nuur se mar.ūb

ne hausla-e-ḳhūb hai ne himmat-e-nā-ḳhūb

gar zaat se baḌh kar nahīñ kuchh bhī unheñ mahbūb

haiñ aap hī is zaat ke jārūb

zaat se mahjūb!

kuchh ḳhvāb haiñ jo gardish-e-ālāt se jūyanda-e-tamkīn

hai jin ke liye bandagī-e-qāzī-e-hājāt se is dahr kī taz.īn

kuchh jin ke liye ġham kī musāvāt se insān kī tāmīn

kuchh ḳhvāb ki jin kā havas-e-jaur hai aa.iin

duniyā hai na diin!

kuchh ḳhvāb haiñ parda-e-anvār magar un kī sahar gum

jis aag se uThtā hai mohabbat kā ḳhamīr us ke sharar gum

hai kul kī ḳhabar un ko magar juz kī ḳhabar gum

ye ḳhvāb haiñ vo jin ke liye martaba-e-dīda-e-tar hech

dil hech hai sar itne barābar haiñ ki sar hech

arz-e-hunar hech!

ai ishq-e-azal-gīr o abad-tāb

ye ḳhvāb mire ḳhvāb nahīñ haiñ ki mire ḳhvāb haiñ kuchh aur

kuchh aur mire ḳhvāb haiñ kuchh aur mirā daur

ḳhvāboñ ke na.e daur meñ ne mor o malaḳh ne asad o saur

ne lazzat-e-taslīm kasī meñ na kasī ko havas-e-jaur

sab ke na.e taur!

ai ishq-e-azal-gīr o abad-tāb

mere bhī haiñ kuchh ḳhvāb!

har ḳhvāb kī saugand!

har-chand ki vo ḳhvāb haiñ sar-basta o rū-band

siine meñ chhupā.e hue goyā.ī-e-doshīza-e-lab-ḳhand

har ḳhvāb meñ ajsām se afkār kaa, mafhūm se guftār kā paivand

ushshāq ke lab-hā-e-azal-tishna kī paivastagī-e-shauq ke mānind

(ai lamha-e-ḳhursand)

ai ishq-e-azal-gīr o abad-tāb, mere bhī haiñ kuchh ḳhvāb

vo ḳhvāb haiñ āzādi-e-kāmil ke na.e ḳhvāb

har sa.ī-e-jigar-doz ke hāsil ke na.e ḳhvāb

aadam kī vilādat ke na.e jashn pe lahrāte jalājil ke na.e ḳhvāb

is ḳhaak kī satvat kī manāzil ke na.e ḳhvāb

yā sīna-e-gītī meñ na.e dil ke na.e ḳhvāb

ai ishq-e-azal-gīr o abad-tāb

mere bhī haiñ kuchh ḳhvāb

mere bhī haiñ kuchh ḳhvāb!

ai ishq-e-azal-gir o abad-tab mere bhi hain kuchh KHwab

mere bhi hain kuchh KHwab

us daur se is daur ke sukhe hue dariyaon se

phaile hue sahraon se aur shahron ke viranon se

virana-garon se main hazin aur udas!

ai ishq-e-azal-gir o abad-tab

mere bhi hain kuchh KHwab!

ai ishq-e-azal-gir o abad-tab mere bhi hain kuchh KHwab

mere bhi hain kuchh KHwab

wo KHwab ki asrar nahin jin ke hamein aaj bhi malum

wo KHwab jo aasudgi-e-martaba-o-jah se

aaludgi-e-gard-e-sar-e-rah se masum

jo zist ki be-huda kashakash se bhi hote nahin madum

KHud zist ka mafhum!

ai ishq-e-azal-gir o abad-tab

ai kahin-e-danish-war o aaali-guhar o pir

tu ne hi batai hamein har KHwab ki tabir

tune hi sujhai gham-e-dil-gir ki tasKHir

TuTi tere hathon hi se har KHauf ki zanjir

ai ishq-e-azal-gir o abad-tab, mere bhi hain kuchh KHwab

mere bhi hain kuchh KHwab

ai ishq-e-azal-gir o abad-tab

kuchh KHwab ki madfun hain ajdad ke KHud-saKHta asmar ke niche

ujDe hue mazhab ke bana reKHta auham ki diwar ke niche

shiraaz ke majzub-e-tunak-jam ke afkar ke niche

tahzib-e-nigun-sar ke aalam ke ambar ke niche

kuchh KHwab hain aazad magar baDhte hue nur se marub

ne hausla-e-KHub hai ne himmat-e-na-KHub

gar zat se baDh kar nahin kuchh bhi unhen mahbub

hain aap hi is zat ke jarub

zat se mahjub!

kuchh KHwab hain jo gardish-e-alat se juyanda-e-tamkin

hai jin ke liye bandagi-e-qazi-e-hajat se is dahr ki tazin

kuchh jin ke liye gham ki musawat se insan ki tamin

kuchh KHwab ki jin ka hawas-e-jaur hai aain

duniya hai na din!

kuchh KHwab hain parda-e-anwar magar un ki sahar gum

jis aag se uThta hai mohabbat ka KHamir us ke sharar gum

hai kul ki KHabar un ko magar juz ki KHabar gum

ye KHwab hain wo jin ke liye martaba-e-dida-e-tar hech

dil hech hai sar itne barabar hain ki sar hech

arz-e-hunar hech!

ai ishq-e-azal-gir o abad-tab

ye KHwab mere KHwab nahin hain ki mere KHwab hain kuchh aur

kuchh aur mere KHwab hain kuchh aur mera daur

KHwabon ke nae daur mein ne mor o malaKH ne asad o saur

ne lazzat-e-taslim kasi mein na kasi ko hawas-e-jaur

sab ke nae taur!

ai ishq-e-azal-gir o abad-tab

mere bhi hain kuchh KHwab!

har KHwab ki saugand!

har-chand ki wo KHwab hain sar-basta o ru-band

sine mein chhupae hue goyai-e-doshiza-e-lab-KHand

har KHwab mein ajsam se afkar ka, mafhum se guftar ka paiwand

ushshaq ke lab-ha-e-azal-tishna ki paiwastagi-e-shauq ke manind

(ai lamha-e-KHursand)

ai ishq-e-azal-gir o abad-tab, mere bhi hain kuchh KHwab

wo KHwab hain aazadi-e-kaamil ke nae KHwab

har sai-e-jigar-doz ke hasil ke nae KHwab

aadam ki wiladat ke nae jashn pe lahraate jalajil ke nae KHwab

is KHak ki satwat ki manazil ke nae KHwab

ya sina-e-giti mein nae dil ke nae KHwab

ai ishq-e-azal-gir o abad-tab

mere bhi hain kuchh KHwab

mere bhi hain kuchh KHwab!