mere school

mere schōl mirī yādoñ ke paikar sun le

maiñ tire vāste rotā huuñ barābar sun le

tere ustādoñ ne mehnat se paḌhāyā hai mujhe

terī benchoñ ne hī insān banāyā hai mujhe

nā-tarāshīda sā hiirā thā tarāshā tū ne

zehn-e-tārīk ko baḳhshā hai ujālā tū ne

ilm kī jhiil kā tairāk banāyā hai mujhe

ḳhauf ko chhīn ke bebāk banāyā hai mujhe

tujh se shafqat bhī milī tujh se mohabbat bhī milī

daulat-e-ilm milī mujh ko sharāfat bhī milī

shafqateñ aisī milī haiñ mujhe ustādoñ kī

parvarish kartā ho jaise koī shahzādoñ kī

terī chāhat meñ maiñ is darja bhī kho jaatā thā

terī benchoñ pe hī kuchh der ko so jaatā thā

mere school meri yaadon ke paikar sun le

main tere waste rota hun barabar sun le

tere ustadon ne mehnat se paDhaya hai mujhe

teri benchon ne hi insan banaya hai mujhe

na-tarashida sa hira tha tarasha tu ne

zehn-e-tarik ko baKHsha hai ujala tu ne

ilm ki jhil ka tairak banaya hai mujhe

KHauf ko chhin ke bebak banaya hai mujhe

tujh se shafqat bhi mili tujh se mohabbat bhi mili

daulat-e-ilm mili mujh ko sharafat bhi mili

shafqaten aisi mili hain mujhe ustadon ki

parwarish karta ho jaise koi shahzadon ki

teri chahat mein main is darja bhi kho jata tha

teri benchon pe hi kuchh der ko so jata tha