mrs-sala-manka

ḳhudā hashr meñ ho madad-gār merā

ki dekhī haiñ maiñ ne mrs.-sālā-māñkā kī āñkheñ

mrs.-sālā-māñkā kī āñkheñ

ki jin ke ufuq haiñ junūbī samundar kī niilī rasā.ī se aage

junūbī samundar kī niilī rasā.ī

ki jis ke jazīre hujūm-e-sahar se daraḳhshāñ

daraḳhshāñ jazīroñ meñ zartāb o unnāb o qurmuz parindoñ kī jaulāñ-gaheñ

aise phailī huī jaise jannat ke dāmāñ

parinde azal aur abad ke mah o saal meñ bāl-afshāñ!

ḳhudā hashr meñ ho madad-gār merā

ki maiñ ne liye haiñ mrs.-sālā-mañkā ke hoñToñ ke bose

vo bose ki jin kī halāvat ke chashme

shumālī zamīnoñ ke zartāb o unnāb o qurmuz daraḳhtoñ

ke mad.hosh bāġhoñ se aage

jahāñ zindagī ke rasīda shagūfoñ ke sīnoñ

se ḳhvāboñ ke ram-dīda zambūr lete haiñ ras aur piite haiñ vo

ki jis ke nashe kī jilā se

zamānoñ kī nādīda mehrāb ke do kināroñ ke nīche

haiñ yak-bārgī guuñj uThte ḳhalā o malā ke jalājil

jalājil ke naġhme baham aise paivast hote haiñ jaise

mrs.-sālā-mañikā ke lab mere lab se!

ḳhudā hashr meñ ho madad-gār merā

ki dekhā hai maiñ ne

mrs.-sālā-mañkā ko bistar meñ shab bhar barahana

vo gardan vo bāheñ vo rāneñ vo pistāñ

ki jin meñ junūbī samundar kī lahroñ ke tūfāñ

shumālī daraḳhtoñ ke bāġhoñ ke phūloñ kī ḳhushbū

jahāñ dam-ba-dam itr o tūfāñ baham aur gurezāñ

mrs.-sālā-mañikā kā jism-e-barhana

ufuq-tā-ufuq jaise añgūr kī bel jis kī

ġhizā āsmānoñ kā nuur aur hāsil

vo lazzat ki jis kā nahīñ koī pāyāñ

ḳhudā ke sivā kaun hai pāk-dāmāñ!

KHuda hashr mein ho madad-gar mera

ki dekhi hain main ne mrs-sala-manka ki aankhen

mrs-sala-manka ki aankhen

ki jin ke ufuq hain junubi samundar ki nili rasai se aage

junubi samundar ki nili rasai

ki jis ke jazire hujum-e-sahar se daraKHshan

daraKHshan jaziron mein zartab o unnab o qurmuz parindon ki jaulan-gahen

aise phaili hui jaise jannat ke daman

parinde azal aur abad ke mah o sal mein baal-afshan!

KHuda hashr mein ho madad-gar mera

ki main ne liye hain mrs-sala-manka ke honTon ke bose

wo bose ki jin ki halawat ke chashme

shumali zaminon ke zartab o unnab o qurmuz daraKHton

ke madhosh baghon se aage

jahan zindagi ke rasida shagufon ke sinon

se KHwabon ke ram-dida zambur lete hain ras aur pite hain wo

ki jis ke nashe ki jila se

zamanon ki nadida mehrab ke do kinaron ke niche

hain yak-bargi gunj uThte KHala o mala ke jalajil

jalajil ke naghme baham aise paiwast hote hain jaise

mrs-sala-manika ke lab mere lab se!

KHuda hashr mein ho madad-gar mera

ki dekha hai main ne

mrs-sala-manka ko bistar mein shab bhar barahana

wo gardan wo bahen wo ranen wo pistan

ki jin mein junubi samundar ki lahron ke tufan

shumali daraKHton ke baghon ke phulon ki KHushbu

jahan dam-ba-dam itr o tufan baham aur gurezan

mrs-sala-manika ka jism-e-barhana

ufuq-ta-ufuq jaise angur ki bel jis ki

ghiza aasmanon ka nur aur hasil

wo lazzat ki jis ka nahin koi payan

KHuda ke siwa kaun hai pak-daman!