mujhe ek git likhna hai

mujhe ik giit likhnā hai aur aisā giit likhnā hai

kisī ne aaj tak likkhā nahīñ jis ko

kisī ne aaj tak gaayā nahīñ jis ko

mujhe ik giit likhnā hai

isī dhartī ke dil kā giit likhnā hai

aur us meñ apne dil kī dhaḌkaneñ bhī mujh ko likhnī haiñ

mujhe ik giit likhnā hai

diloñ kī zūd-asar jādū-garī kā giit likhnā hai

ki tasḳhīr-e-do-‘ālam ho 'urūj-e-ibn-e-ādam ho

mujhe ik giit likhnā hai

ba-nām-e-amn likhnā hai

aur us kī fāḳhta-dhun bhī mujhe ḳhud hī banānī hai

yahī ab dil meñ Thānī hai

mujhe ik giit likhnā hai

muqaddas giit likhnā hai

mujhe maañ ke liye ik giit likhnā hai

ki jis ne dahr meñ paidā kiyā paiġhambaroñ dānishvaroñ aur sūrmāoñ ko

mujhe ye giit 'be-dil' is liye likhnā hai aur sab ko sunānā hai

ki mujh ko merī maañ ne aur ḳhudā ne

sirf isī maqsad kī ḳhātir zindagī dī hai

mujhe ek git likhna hai aur aisa git likhna hai

kisi ne aaj tak likkha nahin jis ko

kisi ne aaj tak gaya nahin jis ko

mujhe ek git likhna hai

isi dharti ke dil ka git likhna hai

aur us mein apne dil ki dhaDkanen bhi mujh ko likhni hain

mujhe ek git likhna hai

dilon ki zud-asar jadu-gari ka git likhna hai

ki tasKHir-e-do-‘alam ho 'uruj-e-ibn-e-adam ho

mujhe ek git likhna hai

ba-nam-e-amn likhna hai

aur us ki faKHta-dhun bhi mujhe KHud hi banani hai

yahi ab dil mein Thani hai

mujhe ek git likhna hai

muqaddas git likhna hai

mujhe man ke liye ek git likhna hai

ki jis ne dahr mein paida kiya paighambaron danishwaron aur surmaon ko

mujhe ye git 'be-dil' is liye likhna hai aur sab ko sunana hai

ki mujh ko meri man ne aur KHuda ne

sirf isi maqsad ki KHatir zindagi di hai