mujhe kahna hai

nahīñ maiñ yuuñ nahīñ kahtā

ki ye duniyā jahannam aur ham sab is kā īñdhan haiñ

nahīñ yuuñ bhī nahīñ kahtā

ki ham jannat ke baasī haiñ

saroñ par lā-javrdī shāmiyāne aur pairoñ meñ

nirāle zā.eqoñ vaale phaloñ ke peḌ shiir o shahad kī nahreñ machaltī haiñ

mujhe to bas yahī kuchh aam sī kuchh chhoTī chhoTī bāteñ kahnī haiñ

mujhe kahnā hai

is dhartī pe gulshan bhī haiñ sahrā bhī

mahaktī narm miTTī bhī

aur us kī kokh meñ ḳhvāboñ kā jaadū aane vaalī nit na.ī fasloñ kī ḳhushbū bhī

chaTaḳhtī aur taptī saḳht be-his ḳhuun kī pyāsī chaTāneñ bhī

mujhe kahnā hai

ham sab apnī dhartī kī

burā.ī aur bhalā.ī saḳhtiyoñ aur narmiyoñ achchhā.iyoñ kotāhiyoñ har rañg

har pahlū ke maz.har haiñ

hameñ insān kī mānind

ḳhair o shar mohabbat aur nafrat dushmanī aur dostī ke saath jiinā hai

isī dhartī kā shahad o sam

isī dhartī ke khaT-miTh jaane pahchāne maze kā jaam piinā hai

mujhe bas itnā kahnā hai

ki ham ko āsmānoñ yā ḳhalāoñ kī koī maḳhlūq mat samjho

nahin main yun nahin kahta

ki ye duniya jahannam aur hum sab is ka indhan hain

nahin yun bhi nahin kahta

ki hum jannat ke basi hain

saron par la-jawrdi shamiyane aur pairon mein

nirale zaeqon wale phalon ke peD shir o shahad ki nahren machalti hain

mujhe to bas yahi kuchh aam si kuchh chhoTi chhoTi baaten kahni hain

mujhe kahna hai

is dharti pe gulshan bhi hain sahra bhi

mahakti narm miTTi bhi

aur us ki kokh mein KHwabon ka jadu aane wali nit nai faslon ki KHushbu bhi

chaTaKHti aur tapti saKHt be-his KHun ki pyasi chaTanen bhi

mujhe kahna hai

hum sab apni dharti ki

burai aur bhalai saKHtiyon aur narmiyon achchhaiyon kotahiyon har rang

har pahlu ke mazhar hain

hamein insan ki manind

KHair o shar mohabbat aur nafrat dushmani aur dosti ke sath jina hai

isi dharti ka shahad o sam

isi dharti ke khaT-miTh jaane pahchane maze ka jam pina hai

mujhe bas itna kahna hai

ki hum ko aasmanon ya KHalaon ki koi maKHluq mat samjho