mujhe sharminda rakhte hain

ye har shab soch kar sotā huuñ aane vaalī sub.hoñ meñ

guloñ se pattiyoñ se os kī būñdeñ churānī haiñ

shah ākāsh kī nazreñ-numā kirnoñ se pahle jaag jaanā hai

sabā-e-ambarīñ ke lams ko mahsūs karnā hai

libās-e-sabz meñ malbūs alhaḌ pattiyoñ kī bāteñ sunñī haiñ

hasīñ doshīza kī muskān sī kaliyoñ se do ik baat kar lūñgā

magar kuchh kar nahīñ paatā ki rāhat roke rakhtī hai

koī afsāna paḌhnā ho kisī kī shā.irī pe baat karnī ho

kisī taḳhlīq se pahle ḳhayāl-o-fikr ko āzād rakhnā ho

kisī sāriq kisī shātir kisī kam-fahm se sachchā.ī kahnī ho

baḌī ma.asūm shakloñ meñ chhupe ayyār ko makkār ko shīsha dikhānā ho

faqīh-e-vaqt amīr-e-shahr kā qazzāq se mal.ūn se rishta batānā ho

magar ye kar nahīñ saktā maslahat ḳhāmosh rakhtī hai

harīm-e-mai-kade meñ ḳhānqāhoñ maTh madrasoñ meñ

barahman shaiḳh se pīr-e-muġhāñ se sāqiyoñ se aur vaa.iz se

ye aksar sochtā huuñ jā ke kah duuñ maiñ

riyā-o-kibr tahī-iḳhlās aur bad-atvārī se tere

jahāñ meñ ishq uḳhuvvat ilm aur aḳhlāq marte haiñ

magar maiñ kah nahīñ saktā aqīdat baaz rakhtī hai

ta.assub ḳhud-pasandī buġhz se kibr-o-hasad se

bisāt-e-zehn-o-dil ko chāhtā huuñ paak kar luuñ

zar-o-imlāk kī ḳhvāhish se apne aap ko āzād kar luuñ

ki jab jab sa.ī kartā huuñ havas inkār kartī hai

magar īqān hai merā hamāre ahd ke bachche

mire kizb-o-riyā ko makr ko aur be-īmānī ko

nafāq-o-bad-qimāshī ko mire zāhir ko bātin ko

huvaidā kar ke chhoḌeñge alal-ailān kah deñge

ki mere baap aise the mire ustāz aise the

so un kī baat se a.amāl se sharminda huuñ maiñ bhī

ye kahne se unheñ izzat na rokegī

na un ko ḳhauf rokegā

unheñ kuchh bhī na rokegā

chalan badlā huā hogā

hamārī saarī izzat saarī zillat dūsroñ ke haq kī pāmālī

kitāb-e-haq ke pannoñ par bahut vāzeh likhī hoñgī

ye har shab soch kar sota hun aane wali subhon mein

gulon se pattiyon se os ki bunden churani hain

shah aakash ki nazren-numa kirnon se pahle jag jaana hai

saba-e-ambarin ke lams ko mahsus karna hai

libas-e-sabz mein malbus alhaD pattiyon ki baaten sunni hain

hasin doshiza ki muskan si kaliyon se do ek baat kar lunga

magar kuchh kar nahin pata ki rahat roke rakhti hai

koi afsana paDhna ho kisi ki shairi pe baat karni ho

kisi taKHliq se pahle KHayal-o-fikr ko aazad rakhna ho

kisi sariq kisi shatir kisi kam-fahm se sachchai kahni ho

baDi masum shaklon mein chhupe ayyar ko makkar ko shisha dikhana ho

faqih-e-waqt amir-e-shahr ka qazzaq se malun se rishta batana ho

magar ye kar nahin sakta maslahat KHamosh rakhti hai

harim-e-mai-kade mein KHanqahon maTh madrason mein

barahman shaiKH se pir-e-mughan se saqiyon se aur waiz se

ye aksar sochta hun ja ke kah dun main

riya-o-kibr tahi-iKHlas aur bad-atwari se tere

jahan mein ishq uKHuwwat ilm aur aKHlaq marte hain

magar main kah nahin sakta aqidat baz rakhti hai

tassub KHud-pasandi bughz se kibr-o-hasad se

bisat-e-zehn-o-dil ko chahta hun pak kar lun

zar-o-imlak ki KHwahish se apne aap ko aazad kar lun

ki jab jab sai karta hun hawas inkar karti hai

magar iqan hai mera hamare ahd ke bachche

mere kizb-o-riya ko makr ko aur be-imani ko

nafaq-o-bad-qimashi ko mere zahir ko baatin ko

huwaida kar ke chhoDenge alal-ailan kah denge

ki mere bap aise the mere ustaz aise the

so un ki baat se aamal se sharminda hun main bhi

ye kahne se unhen izzat na rokegi

na un ko KHauf rokega

unhen kuchh bhi na rokega

chalan badla hua hoga

hamari sari izzat sari zillat dusron ke haq ki pamali

kitab-e-haq ke pannon par bahut wazeh likhi hongi