munkir ka KHauf

purānā pāsbāñ zill-e-ilāhī kā

jise chāhe kare mansab atā ālam-panāhī kā

use tarkīb aatī hai

kisī mazmūn-kohna ko nayā unvān dene kī

vo dīda-var hamesha se muayyan hai

hamāre rāste ke past-o-bālā par

vo daanā apne mansūbe banātā hai

hamārī fitratoñ kī ḳhaak zulmat se

hamārī ḳhvāhish-e-takrār kī derīna aadat se

vo ma.abad-e-sāz but-gar apnī hastī ke taqaddus meñ

sadā mahfūz rakhtā hai

hamāre ghar ko tahqīqī tajassus kī balāoñ se

kahīñ auhām kī umda shabīhoñ meñ

saqāfat ke nigāristāñ sajātā hai

kahīñ ḳhush-fahmiyoñ ke isti.āre se

hare lafzoñ ke bāġhīche khilātā hai

kahīñ nok-e-sināñ ke ism o afsūñ se

lahū kī buuñd meñ taslīm kī kirneñ jagātā hai

qulūb ahl-e-zamīñ ke us kī muTThī meñ dhaḌakte haiñ

shu.ūr us kā sadā māmūr rahtā hai

hameñ achchhe bure ke falsafe kī aaḌ meñ

ham se chhupāne par

magar is kā mudāvā kyā

ki vo parvardigār-e-zor-e-hikmat apnī nīndoñ meñ

hamesha se

vajūd-e-fard meñ ik muztarib sī shai se Dartā hai

vo shai jis kī haqīqat

vaqt kā iblīs us par faash kartā hai

purana pasban zill-e-ilahi ka

jise chahe kare mansab ata aalam-panahi ka

use tarkib aati hai

kisi mazmun-kohna ko naya unwan dene ki

wo dida-war hamesha se muayyan hai

hamare raste ke past-o-baala par

wo dana apne mansube banata hai

hamari fitraton ki KHak zulmat se

hamari KHwahish-e-takrar ki derina aadat se

wo mabad-e-saz but-gar apni hasti ke taqaddus mein

sada mahfuz rakhta hai

hamare ghar ko tahqiqi tajassus ki balaon se

kahin auham ki umda shabihon mein

saqafat ke nigaristan sajata hai

kahin KHush-fahmiyon ke istiare se

hare lafzon ke baghiche khilata hai

kahin nok-e-sinan ke ism o afsun se

lahu ki bund mein taslim ki kirnen jagata hai

qulub ahl-e-zamin ke us ki muTThi mein dhaDakte hain

shuur us ka sada mamur rahta hai

hamein achchhe bure ke falsafe ki aaD mein

hum se chhupane par

magar is ka mudawa kya

ki wo parwardigar-e-zor-e-hikmat apni nindon mein

hamesha se

wajud-e-fard mein ek muztarib si shai se Darta hai

wo shai jis ki haqiqat

waqt ka iblis us par fash karta hai