murghabi

Dhal gayā din aur shabnam hai zamīñ par qatra-rez

gosha-e-maġhrib meñ gulgūñ hai shafaq se āsmāñ

paḌ rahī haiñ duur tak sūraj kī kirneñ zard zard

jā rahī hai to akelī shaam ko uḌtī kahāñ

dekhtā hai kyuuñ abas sayyād sū-e-asmāñ

yaas kī nazroñ se terī shaukat-e-parvāz ko

arġhavāñ-zār-falak ke manzar-e-ḳhush-rañg ne

kar diyā hai aur dilkash tere naqsh-e-nāz ko

DhūñDtī phirtī hai kyā koī suhānā ābshār

yā ki sar-garm talāsh-e-dāman-e-dariyā hai tū

yā kisī bahr-e-tamavvuj-ḳhez kī hai justujū

yuuñ sukūt-e-shām meñ kyuuñ āsmāñ-paimā hai tū

tū jo be-sang-e-nishān-e-jāda-o-be-marhala

kar rahī hai āsmāñ par qat.a tabqāt-e-havā

uḌ sake be-badraqa tū ye kahāñ terī majāl

koī tāqat hai magar terī muqarrar rahnumā

ai subuk-parvāz! terī sur.at-e-parvāz ne

tai kiye kitne hī din bhar sarv-tabqāt-e-nasīm

ho ke dāmānda zamīñ par gar na shahpar joḌ kar

shab kī zulmat kā hai garche sar pe tūfān-e-azīm

ho chukī terī mashaqqat ḳhatm tujh ko an-qarīb

garmiyoñ kā ik suhānā ghar milegā ḳhush-gavār

gaatī hogī chhoTī chiḌiyoñ meñ ham-āhañgī se tū

aur nasheman par tire hogī niyastāñ kī bahār

ho ga.ī ġhā.eb fazā-e-āsmāñ meñ garche tū

aur ab āñkhoñ meñ hai terā tasavvur yādgār

maiñ ne sīkhā hai sabaq lekin tirī parvāz se

hai tarīq-e-zindagī meñ tū mirī āmoz-gār

mantiqā se mantiqā tak ai subuk-parvāz-shauq

vus.at-e-auj-e-falak par hai jo terā rāhbar

mujh ko bhī le jā.egā vo manzil-e-maqsūd tak

jab karūñgā jāda-e-hastī se maiñ tanhā safar

Dhal gaya din aur shabnam hai zamin par qatra-rez

gosha-e-maghrib mein gulgun hai shafaq se aasman

paD rahi hain dur tak suraj ki kirnen zard zard

ja rahi hai to akeli sham ko uDti kahan

dekhta hai kyun abas sayyaad su-e-asman

yas ki nazron se teri shaukat-e-parwaz ko

arghawan-zar-falak ke manzar-e-KHush-rang ne

kar diya hai aur dilkash tere naqsh-e-naz ko

DhunDti phirti hai kya koi suhana aabshaar

ya ki sar-garm talash-e-daman-e-dariya hai tu

ya kisi bahr-e-tamawwuj-KHez ki hai justuju

yun sukut-e-sham mein kyun aasman-paima hai tu

tu jo be-sang-e-nishan-e-jada-o-be-marhala

kar rahi hai aasman par qata tabqat-e-hawa

uD sake be-badraqa tu ye kahan teri majal

koi taqat hai magar teri muqarrar rahnuma

ai subuk-parwaz! teri surat-e-parwaz ne

tai kiye kitne hi din bhar sarw-tabqat-e-nasim

ho ke damanda zamin par gar na shahpar joD kar

shab ki zulmat ka hai garche sar pe tufan-e-azim

ho chuki teri mashaqqat KHatm tujh ko an-qarib

garmiyon ka ek suhana ghar milega KHush-gawar

gati hogi chhoTi chiDiyon mein ham-ahangi se tu

aur nasheman par tere hogi niyastan ki bahaar

ho gai ghaeb faza-e-asman mein garche tu

aur ab aankhon mein hai tera tasawwur yaadgar

main ne sikha hai sabaq lekin teri parwaz se

hai tariq-e-zindagi mein tu meri aamoz-gar

mantiqa se mantiqa tak ai subuk-parwaz-shauq

wusat-e-auj-e-falak par hai jo tera rahbar

mujh ko bhi le jaega wo manzil-e-maqsud tak

jab karunga jada-e-hasti se main tanha safar