nai mahfil mein pahli shanasai

na.ī jagah thī duur duur tak āḳhir par dīvāreñ shab kī

kuchh yāroñ ne barpā kar dī ik mahfil kuchh apne Dhab kī

ūñche dar se dāḳhil ho kar saaf nasheb meñ baiThe jā kar

ek maqām meñ hue ikaTThe raunaq aur vīrānī aa kar

markaz-e-dar se jashn-bapā tak sair thī shām-e-mehr-o-vafā kī

ḳhushī thī us se milne jaisī bechainī thī abr-o-havā kī

sab rañgoñ ke log jam.a the ek hī manzil thī un sab kī

ik bastī ālām se ḳhālī ek fazā kisī ḳhvāb-e-tarab kī

jañgal kī shādābī jaisā pahnā thā koī jalva us ne

pairāhan ik na.ī vaz.a kā khule samundar jaisā us ne

kar rakkhā thā chehra apnā dukh-mukh se be-parvā us ne

merī taraf takne se pahle chāroñ jānib dekhā us ne

nai jagah thi dur dur tak aaKHir par diwaren shab ki

kuchh yaron ne barpa kar di ek mahfil kuchh apne Dhab ki

unche dar se daKHil ho kar saf nasheb mein baiThe ja kar

ek maqam mein hue ikaTThe raunaq aur virani aa kar

markaz-e-dar se jashn-bapa tak sair thi sham-e-mehr-o-wafa ki

KHushi thi us se milne jaisi bechaini thi abr-o-hawa ki

sab rangon ke log jama the ek hi manzil thi un sab ki

ek basti aalam se KHali ek faza kisi KHwab-e-tarab ki

jangal ki shadabi jaisa pahna tha koi jalwa us ne

pairahan ek nai waza ka khule samundar jaisa us ne

kar rakkha tha chehra apna dukh-mukh se be-parwa us ne

meri taraf takne se pahle chaaron jaanib dekha us ne