naya aazar

mirī rafīq-e-tarab-gāh terī aamad par

na.e suroñ meñ na.e giit gaa.e the maiñ ne

nafas nafas meñ jalā kar umiid ke dīpak

qadam qadam pe sitāre bichhā.e the maiñ ne

havā ke loch galī se nikhār māñgā thā

tire jamāl kā chehra sañvārne ke liye

kañval kañval se ḳharīdī thī hasrat-e-dīdār

nazar nazar ko jigar meñ utārne ke liye

bahut se giit chhalakte rahe ufuq ke qarīb

bahut se phuul baraste rahe fazāoñ meñ

ulajh ulajh ga.ī majrūh ziist kī girheñ

bikhar bikhar ga.iiñ añgḌā.iyāñ ḳhalāoñ meñ

maiñ pūchhtā huuñ ki ai rañg-o-nūr kī devī

ilāj-e-tīra-shabī kyā isī ko kahte haiñ

bujhe bujhe se ye muflis diye na jaane kyā

sulag sulag ke tirī be-hisī ko kahte haiñ

ye giit sar-ba-garebāñ haiñ tere jaane se

ye nau-urūs sitāre baḌhā rahe haiñ suhāg

kalī kalī ko tirī be-ruḳhī kā shikva hai

nafas nafas se nikaltī hai ek aisī aag

jise bujhā.ūñ to dil zamharīr ho jaa.e

tirā aziim tasavvur haqīr ho jaa.e

meri rafiq-e-tarab-gah teri aamad par

nae suron mein nae git gae the main ne

nafas nafas mein jala kar umid ke dipak

qadam qadam pe sitare bichhae the main ne

hawa ke loch gali se nikhaar manga tha

tere jamal ka chehra sanwarne ke liye

kanwal kanwal se KHaridi thi hasrat-e-didar

nazar nazar ko jigar mein utarne ke liye

bahut se git chhalakte rahe ufuq ke qarib

bahut se phul baraste rahe fazaon mein

ulajh ulajh gai majruh zist ki girhen

bikhar bikhar gain angDaiyan KHalaon mein

main puchhta hun ki ai rang-o-nur ki dewi

ilaj-e-tira-shabi kya isi ko kahte hain

bujhe bujhe se ye muflis diye na jaane kya

sulag sulag ke teri be-hisi ko kahte hain

ye git sar-ba-gareban hain tere jaane se

ye nau-urus sitare baDha rahe hain suhag

kali kali ko teri be-ruKHi ka shikwa hai

nafas nafas se nikalti hai ek aisi aag

jise bujhaun to dil zamharir ho jae

tera azim tasawwur haqir ho jae