naya husn

kitnī rañgīñ hai fazā kitnī hasīñ hai duniyā

kitnā sarshār hai zauq-e-chaman-ārā.ī aaj

is salīqe se sajā.ī ga.ī bazm-e-gītī

tū bhī dīvār-e-ajantā se utar aa.ī aaj

rū-numā.ī kī ye saa.at ye tahī-dastī-e-shauq

na churā saktā huuñ āñkheñ na milā saktā huuñ

pyaar sauġhāt, vafā nazr, mohabbat tohfa

yahī daulat tire qadmoñ pe luTā saktā huuñ

kab se taḳh.īl meñ larzāñ thā ye nāzuk paikar

kab se ḳhvāboñ meñ machaltī thī javānī terī

mere afsāne kā unvān banī jaatī hai

Dhal ke sāñche meñ haqīqat ke kahānī terī

marhale jhel ke nikhrā hai mazāq-e-taḳhlīq

sa.ī-e-paiham ne diye haiñ ye ḳhad-o-ḳhāl tujhe

zindagī chaltī rahī kāñToñ pe, añgāroñ par

jab milī itnī hasīñ, itnī subuk chaal tujhe

tere qāmat meñ hai insāñ kī bulandī kā vaqār

duḳhatar-e-shahr hai, tahzīb kā shahkār hai tū

ab na jhapkegī palak, ab na haTeñgī nazreñ

husn kā mere liye āḳhirī me.aar hai tū

ye tirā paikar-e-sīmīñ, ye gulābī saarī

dast-e-mehnat ne shafaq ban ke uḌhā dī tujh ko

jis se mahrūm hai fitrat kā jamāl-e-rañgīñ

tarbiyat ne vo latāfat bhī sikhā dī tujh ko

āgahī ne tirī bātoñ meñ khilāīñ kaliyāñ

ilm ne shakkarīñ lahje meñ nichoḌe añgūr

dilrubā.ī kā ye andāz kise aatā thā

tū hai jis saañs meñ nazdīk usī saañs meñ duur

ye latāfat, ye nazākat, ye hayā, ye shoḳhī

sau diye julte haiñ umDī huī zulmat ke ḳhilāf

lab-e-shādāb pe chhalkī huī gulnār hañsī

ik baġhāvat hai ye ā.īn-e-jarāhat ke ḳhilāf

hausle jaag uThe soz-e-yaqīñ jaag uThā

nigah-e-nāz ke be-nām ishāroñ ko salām

tū jahāñ rahtī hai us arz-e-hasīñ par sajda

jin meñ tū miltī hai un rāh-guzāroñ ko salām

aa qarīb aa ki ye juuḌā maiñ pareshāñ kar duuñ

tishna-kāmī ko ghaTāoñ kā payām aa jaa.e

jis ke māthe se ubhartī haiñ hazāroñ sub.heñ

mirī duniyā meñ bhī aisī koī shaam aa jaa.e

kitni rangin hai faza kitni hasin hai duniya

kitna sarshaar hai zauq-e-chaman-arai aaj

is saliqe se sajai gai bazm-e-giti

tu bhi diwar-e-ajanta se utar aai aaj

ru-numai ki ye saat ye tahi-dasti-e-shauq

na chura sakta hun aankhen na mila sakta hun

pyar saughat, wafa nazr, mohabbat tohfa

yahi daulat tere qadmon pe luTa sakta hun

kab se taKHil mein larzan tha ye nazuk paikar

kab se KHwabon mein machalti thi jawani teri

mere afsane ka unwan bani jati hai

Dhal ke sanche mein haqiqat ke kahani teri

marhale jhel ke nikhra hai mazaq-e-taKHliq

sai-e-paiham ne diye hain ye KHad-o-KHal tujhe

zindagi chalti rahi kanTon pe, angaron par

jab mili itni hasin, itni subuk chaal tujhe

tere qamat mein hai insan ki bulandi ka waqar

duKHatar-e-shahr hai, tahzib ka shahkar hai tu

ab na jhapkegi palak, ab na haTengi nazren

husn ka mere liye aaKHiri mear hai tu

ye tera paikar-e-simin, ye gulabi sari

dast-e-mehnat ne shafaq ban ke uDha di tujh ko

jis se mahrum hai fitrat ka jamal-e-rangin

tarbiyat ne wo latafat bhi sikha di tujh ko

aagahi ne teri baaton mein khilain kaliyan

ilm ne shakkarin lahje mein nichoDe angur

dilrubai ka ye andaz kise aata tha

tu hai jis sans mein nazdik usi sans mein dur

ye latafat, ye nazakat, ye haya, ye shoKHi

sau diye julte hain umDi hui zulmat ke KHilaf

lab-e-shadab pe chhalki hui gulnar hansi

ek baghawat hai ye aain-e-jarahat ke KHilaf

hausle jag uThe soz-e-yaqin jag uTha

nigah-e-naz ke be-nam ishaaron ko salam

tu jahan rahti hai us arz-e-hasin par sajda

jin mein tu milti hai un rah-guzaron ko salam

aa qarib aa ki ye juDa main pareshan kar dun

tishna-kaami ko ghaTaon ka payam aa jae

jis ke mathe se ubharti hain hazaron subhen

meri duniya mein bhi aisi koi sham aa jae