nazr-e-dil

apne dil ko donoñ aalam se uThā saktā huuñ maiñ

kyā samajhtī ho ki tum ko bhī bhulā saktā huuñ maiñ

kaun tum se chhīn saktā hai mujhe kyā vahm hai

ḳhud zuleḳhā se bhī to dāman bachā saktā huuñ maiñ

dil meñ tum paidā karo pahle mirī sī jur.ateñ

aur phir dekho ki tum ko kyā banā saktā huuñ maiñ

dafn kar saktā huuñ siine meñ tumhāre raaz ko

aur tum chāho to afsāna banā saktā huuñ meñ

meñ qasam khātā huuñ apne nutq ke e.ajāz kī

tum ko bazm-e-māh-o-anjum meñ biThā saktā huuñ maiñ

sar pe rakh saktā huuñ tāj-e-kishvar-e-nūrāniyāñ

mahfil-e-ḳhurshīd ko nīchā dikhā saktā huuñ maiñ

maiñ bahut sarkash huuñ lekin ik tumhāre vāste

dil bujhā saktā huuñ maiñ āñkheñ bachā saktā huuñ maiñ

tum agar rūTho to ik tum ko manāne ke liye

giit gā saktā huuñ maiñ aañsū bahā saktā huuñ maiñ

jazb hai dil meñ mire donoñ jahāñ kā soz-o-sāz

barbat-e-fitrat kā har naġhma sunā saktā huuñ maiñ

tum samajhtī ho ki haiñ parde bahut se darmiyāñ

maiñ ye kahtā huuñ ki har parda uThā saktā huuñ maiñ

tum ki ban saktī ho har mahfil meñ firdaus-e-nazar

mujh ko ye da.avā ki har mahfil pe chhā saktā huuñ maiñ

aao mil kar inqalāb-e-tāza-tar paidā kareñ

dahr par is tarah chhā jaa.eñ ki sab dekhā kareñ

apne dil ko donon aalam se uTha sakta hun main

kya samajhti ho ki tum ko bhi bhula sakta hun main

kaun tum se chhin sakta hai mujhe kya wahm hai

KHud zuleKHa se bhi to daman bacha sakta hun main

dil mein tum paida karo pahle meri si juraten

aur phir dekho ki tum ko kya bana sakta hun main

dafn kar sakta hun sine mein tumhaare raaz ko

aur tum chaho to afsana bana sakta hun mein

mein qasam khata hun apne nutq ke eajaz ki

tum ko bazm-e-mah-o-anjum mein biTha sakta hun main

sar pe rakh sakta hun taj-e-kishwar-e-nuraniyan

mahfil-e-KHurshid ko nicha dikha sakta hun main

main bahut sarkash hun lekin ek tumhaare waste

dil bujha sakta hun main aankhen bacha sakta hun main

tum agar ruTho to ek tum ko manane ke liye

git ga sakta hun main aansu baha sakta hun main

jazb hai dil mein mere donon jahan ka soz-o-saz

barbat-e-fitrat ka har naghma suna sakta hun main

tum samajhti ho ki hain parde bahut se darmiyan

main ye kahta hun ki har parda uTha sakta hun main

tum ki ban sakti ho har mahfil mein firdaus-e-nazar

mujh ko ye dawa ki har mahfil pe chha sakta hun main

aao mil kar inqalab-e-taza-tar paida karen

dahr par is tarah chha jaen ki sab dekha karen