nazr-e-Khaalida

dil masarrat kī farāvānī se dīvāna hai aaj

dekhnā ye kaun āḳhir zeb-e-Kāshana hai aaj

Kaif-e-sehba-e-Tarab meñ ġharq-e-maiḳhāna hai aaj

har shajar sāqī-e-mai har phuul paimāna hai aaj

ġhuncha-o-gul the yahī lekin ye ra.anā.ī na thī

is gulistāñ meñ bahār is dhuum se aa.ī na thī

nargis-e-maḳhmūr hai lazzat-e-kash-e-khāb-e-nishāt

phuuT niklā hai gul-e-nasrīñ se sailāb-e-nashāt

ahl-e-mahfil ke liye mushkil hai ab tāb-e-nashāt

aaj paimānoñ se chhalkegī mai-e-nāb-e-nashāt

par-fishāñ hai jazba-e-pinhāñ ubharne ke liye

muztarib hai zarra zarra raqs karne ke liye

phir idhar aa.e na aa.e ye shamīm-e-jāñ-fazā

phir mayassar ho na ho aisā samāñ aisī havā

chheḌ is andāz se ai mutrib-e-rañgīñ-navā

TuuT jaa.e aaj ik ik taar tere saaz kā

zikr jis kā zohra-o-parvīñ ke kāshāne meñ hai

vo sanam bhī aaj apne hī sanam-ḳhāne meñ hai

ḳhālida tū hai bahisht-e-turkmānī kī bahār

terī peshānī pe nūr-e-hurriyat-e-ā.īna-kār

tere ruḳh se partav-e-ma.asōm-e-mariyam āshkār

tere javoñ kī sabāhat se farishte sharmsār

gul pashemāñ qalb-e-bulbul rashk se do-nīm hai

terī bātoñ meñ ḳhumār-e-kausar-o-tasnīm haiñ

yuuñ to ham har sham-e-ilm-o-fan ke parvāne rahe

ye haqīqat hai ki ham tere bhī dīvāne rahe

muddatoñ apnī zabāñ par tere afsāne rahe

tū rahī begāna lekin ham na begāne rahe

yaad terī ik zamāne se hamārī dil meñ thī

tū yahāñ aane se pahle bhī isī mahfil meñ thī

shauq kī shorish jamāl-o-nūr kā sailāb hai

har kalī sāz-e-tarab hai har nazar mizrāb hai

aañkh hairāñ rūh-e-arbāb-e-vafā betāb hai

ye hamāre ḳhvāb kī ta.abīr hai ye ḳhvāb hai

lāla-o-gul kyā chaman bhī tere qadmoñ par nisār

ye guhar-hā-e-suḳhan bhī tere qadmoñ par nisār

ai muqaddas huur ai parvarda-e-mauj-e-nasīm

rūh-e-ishrate-gāh-e-sāhil jān-e-tūfān-e-azīm

tū ne turkoñ ko dikhā.ī hai sirāt-e-mustaqīm

phūñk Daale haiñ ta.assub ke hijābāt-e-qadīm

zo.af dikhlā.ī hai jab bhī fitrat-e-ahrār ne

aag barsā dī hai tere nutq-e-gauhar-bār ne

rah chukī hai haath meñ tere vo teġh-e-be-niyām

jis kī jumbish ne badal Daalā hukūmat kā nizām

tark-e-uftāda ko tū ne hī diyā izn-e-ḳhirām

tere hī hāthoñ ne chhalkā.e haiñ āzādī ke jaam

tū ne jo ehsāñ kiyā haiñ millat-e-ahrār par

naqsh haiñ ab tak sañvarnā ke dar-o-dīvār par

haañ batā de ham ko bhī ai rūh-e-arbāb-e-niyāz

kis tarah miTtā hai āḳhir rang-o-ḳhūñ kā imtiyāz

dil pe kyuuñ kar faash ho jaate haiñ āzādī ke raaz

chheḌte haiñ kis tarah mahfil meñ.... bedārī kā saaz

terī āñkhoñ meñ surūr-e-ishrat-e-jamhūr hai

aah ye jauhar hamārī dastaras se duur hai

mahram-e-dard-o-masarrat rāz-dār-e-sub.h-o-shām

mahfil-e-fitrat kī ḳhamoshī hai tujh se ham-kalām

terī hastī āsmān-e-tark kā māh-e-tamām

tū mohabbat har nafas terā mohabbat kā payām

gulshan-e-mashriq meñ manind-e-saba aa.ī hai tū

sub.h-e-raushan kā payām-e-jān-fazā laa.ī hai tū

qurbat-e-gul kis qadar jāñ-baḳhsh hai ḳhāroñ se pūchh

chāñd kī tanvīr meñ kyā lutf hai tāroñ se pūchh

nashsha-e-sahbā meñ kyā lazzat hai mai-ḳhāroñ se pūchh

chārasāzī meñ maza kyā kyā hai bīmāroñ se pūchh

rūh-o-dil ko jagmagā de jalva ārā.ī tirī

kam se kam itnā to kar jaa.e masīhā.ī tirī

koī dam meñ is gulistāñ se nikalnā hai hameñ

farsh-e-gul se duur añgāroñ pe chalnā hai hameñ

ḳhār-zār-e-ġham ko pairoñ se kuchalnā hai hameñ

jāda-e-manzil meñ girnā hai sambhalnā hai hameñ

dars aisā de ke dil āzurda-e-manzil na ho

fikr-e-lā-hāsil na ho andesha-e-bātil na ho

dil masarrat ki farawani se diwana hai aaj

dekhna ye kaun aaKHir zeb-e-Kashana hai aaj

Kaif-e-sehba-e-Tarab mein gharq-e-maiKHana hai aaj

har shajar saqi-e-mai har phul paimana hai aaj

ghuncha-o-gul the yahi lekin ye ranai na thi

is gulistan mein bahaar is dhum se aai na thi

nargis-e-maKHmur hai lazzat-e-kash-e-khab-e-nishat

phuT nikla hai gul-e-nasrin se sailab-e-nashat

ahl-e-mahfil ke liye mushkil hai ab tab-e-nashat

aaj paimanon se chhalkegi mai-e-nab-e-nashat

par-fishan hai jazba-e-pinhan ubharne ke liye

muztarib hai zarra zarra raqs karne ke liye

phir idhar aae na aae ye shamim-e-jaan-faza

phir mayassar ho na ho aisa saman aisi hawa

chheD is andaz se ai mutrib-e-rangin-nawa

TuT jae aaj ek ek tar tere saz ka

zikr jis ka zohra-o-parwin ke kashane mein hai

wo sanam bhi aaj apne hi sanam-KHane mein hai

KHalida tu hai bahisht-e-turkmani ki bahaar

teri peshani pe nur-e-hurriyat-e-aina-kar

tere ruKH se partaw-e-masoom-e-mariyam aashkar

tere jawon ki sabahat se farishte sharmsar

gul pasheman qalb-e-bulbul rashk se do-nim hai

teri baaton mein KHumar-e-kausar-o-tasnim hain

yun to hum har sham-e-ilm-o-fan ke parwane rahe

ye haqiqat hai ki hum tere bhi diwane rahe

muddaton apni zaban par tere afsane rahe

tu rahi begana lekin hum na begane rahe

yaad teri ek zamane se hamari dil mein thi

tu yahan aane se pahle bhi isi mahfil mein thi

shauq ki shorish jamal-o-nur ka sailab hai

har kali saz-e-tarab hai har nazar mizrab hai

aankh hairan ruh-e-arbab-e-wafa betab hai

ye hamare KHwab ki tabir hai ye KHwab hai

lala-o-gul kya chaman bhi tere qadmon par nisar

ye guhar-ha-e-suKHan bhi tere qadmon par nisar

ai muqaddas hur ai parwarda-e-mauj-e-nasim

ruh-e-ishrate-gah-e-sahil jaan-e-tufan-e-azim

tu ne turkon ko dikhai hai siraat-e-mustaqim

phunk Dale hain tassub ke hijabaat-e-qadim

zoaf dikhlai hai jab bhi fitrat-e-ahrar ne

aag barsa di hai tere nutq-e-gauhar-bar ne

rah chuki hai hath mein tere wo tegh-e-be-niyam

jis ki jumbish ne badal Dala hukumat ka nizam

tark-e-uftada ko tu ne hi diya izn-e-KHiram

tere hi hathon ne chhalkae hain aazadi ke jam

tu ne jo ehsan kiya hain millat-e-ahrar par

naqsh hain ab tak sanwarna ke dar-o-diwar par

han bata de hum ko bhi ai ruh-e-arbab-e-niyaz

kis tarah miTta hai aaKHir rang-o-KHun ka imtiyaz

dil pe kyun kar fash ho jate hain aazadi ke raaz

chheDte hain kis tarah mahfil mein bedari ka saz

teri aankhon mein surur-e-ishrat-e-jamhur hai

aah ye jauhar hamari dastaras se dur hai

mahram-e-dard-o-masarrat raaz-dar-e-subh-o-sham

mahfil-e-fitrat ki KHamoshi hai tujh se ham-kalam

teri hasti aasman-e-tark ka mah-e-tamam

tu mohabbat har nafas tera mohabbat ka payam

gulshan-e-mashriq mein manind-e-saba aai hai tu

subh-e-raushan ka payam-e-jaan-faza lai hai tu

qurbat-e-gul kis qadar jaan-baKHsh hai KHaron se puchh

chand ki tanwir mein kya lutf hai taron se puchh

nashsha-e-sahba mein kya lazzat hai mai-KHaron se puchh

chaarasazi mein maza kya kya hai bimaron se puchh

ruh-o-dil ko jagmaga de jalwa aarai teri

kam se kam itna to kar jae masihai teri

koi dam mein is gulistan se nikalna hai hamein

farsh-e-gul se dur angaron pe chalna hai hamein

KHar-zar-e-gham ko pairon se kuchalna hai hamein

jada-e-manzil mein girna hai sambhalna hai hamein

dars aisa de ke dil aazurda-e-manzil na ho

fikr-e-la-hasil na ho andesha-e-baatil na ho