nilo
Interesting Fact
gyaara farvarii 1965 ko lahore men afro-ashiyai majlis-e-muzaakira ke manduubiin ke liye ek Dinner aur saqaafatii show kaa ehtimaam kiyaa gayaa thaa .is show ke muntazimiin mashshoor filmii adaakaar niilo ke paas aphunche aur use ek saqaafatii show men raqs karne kii daavat dii . jab niilo ne is taqriib shirkat se inkaar karnaa chaahaa to muntazimiin ne jo hukuumat-e-vaqt ke aalaa ohdon par faaiz the ,use dhamkiyaan diin aur be-izzat kiyaa . niilo par is be-izzatii kaa itnaa asar huaa ki us ne kaafii miqdaar men KHvaab aavar goliyaan khaa kar khud kushii karne kii koshish kii . niilo ko be hoshi ke aalam men hospital pahunchaayaa gayaa jahaan doctor ne kaii din kii mehnat ke baad us kii jaan bachaa lii. is vaaqie kaa filmii duniyaa men bahut asar aur shadiid radd-e-amall huaa. pakistan film produsers assosiation aur film star assosiation ne is par shadiid ehtijaaj kiyaa aur ek din kii haDtaal bhii kii . is vaaqoe se muta.assir ho kar habiib jalib ne apni ma.arka aaraa nazm "niilo" raqam kii.. is nazm ko baad-azaa.n film ''zarqa'' men niilo par hi filmaayaa gayaa . is nazm kaa pahlaa band thaa "tuu kii naavaaqif-e-aadaab-e-shahanshaahii thii , raqs zanjiir pahan kar bhii kiyaa jaataa hai, tujh ko inkaar kii jur.at jo huii to kyuun kar , saayaa-e-shaah is tarah jiyaa jaataa hai . mashhoor film saaz hidaayatkaar aur kahaanii naves riyaz shaahid ne niilo kii jur.at aur izzat-e-nafs ko yuu.n khiraaj-e-tahsiin pesh kiyaa ki use shaadii ki peshkash kar dii aur donon rashta-e-azdavaaj men munsalik ho gae ....
tū ki nā-vāqif-e-ādāb-e-shahanshāhī thī
raqs zanjīr pahan kar bhī kiyā jaatā hai
tujh ko inkār kī jur.at jo huī to kyūñkar
sāya-e-shāh meñ is tarah jiyā jaatā hai
ahl-e-sarvat kī ye tajvīz hai sarkash laḌkī
tujh ko darbār meñ koḌoñ se nachāyā jaa.e
nāchte nāchte ho jaa.e jo paa.el ḳhāmosh
phir na tā-zīst tujhe hosh meñ laayā jaa.e
log is manzar-e-jāñkāh ko jab dekheñge
aur baḌh jā.egā kuchh satvat-e-shāhī kā jalāl
tere anjām se har shaḳhs ko ibrat hogī
sar uThāne kā re.āyā ko na aa.egā ḳhayāl
tab-e-shāhāna pe jo log girāñ hote haiñ
haañ unheñ zahr bharā jaam diyā jaatā hai
tū ki nā-vāqif-e-ādāb-e-shahanshāhī thī
raqs zanjīr pahan kar bhī kiyā jaatā hai
tu ki na-waqif-e-adab-e-shahanshahi thi
raqs zanjir pahan kar bhi kiya jata hai
tujh ko inkar ki jurat jo hui to kyunkar
saya-e-shah mein is tarah jiya jata hai
ahl-e-sarwat ki ye tajwiz hai sarkash laDki
tujh ko darbar mein koDon se nachaya jae
nachte nachte ho jae jo pael KHamosh
phir na ta-zist tujhe hosh mein laya jae
log is manzar-e-jaankah ko jab dekhenge
aur baDh jaega kuchh satwat-e-shahi ka jalal
tere anjam se har shaKHs ko ibrat hogi
sar uThane ka reaya ko na aaega KHayal
tab-e-shahana pe jo log giran hote hain
han unhen zahr bhara jam diya jata hai
tu ki na-waqif-e-adab-e-shahanshahi thi
raqs zanjir pahan kar bhi kiya jata hai
Source:
Kulliyat Habeeb Jalib (Pg. 219)
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.