paDosi

ai aish-mahal ke rahne vaalo

dekho to kabhī nazar uThā kar

haal apne paḌosiyoñ kā bhī kuchh

TuuTe hue jhoñpaḌoñ ke andar

insān kī shakl meñ bahā.im

aulād-e-bashar giddhoñ se bad-tar

nā-chār-o-tabāh-o-zār-o-bīmār

rusvā-o-zalīl-o-ḳhvār-o-abtar

fāqoñ kī hai jin ke ruḳh pe zardī

fikroñ se jo ho rahe haiñ lāġhar

kapḌā nahīñ jin ke tan pe sābit

chādar hai na jin ke paas bistar

sūkhī huī roTiyāñ bhī jin ko

miltī nahīñ do do vaqt aksar

dekhī nahīñ amn-o-āfiyat kī

sūrat bhī jinhoñ ne zindagī-bhar

qismat meñ nahīñ hai jin kī ārām

kolhū kā jo bail haiñ sarāsar

lekin tumheñ ġhāliban ye ik baat

ma.alūm nahīñ hai banda-parvar

sadqa hai unhīñ kī jūtiyoñ kā

saarī ye tumhārī shaukat-o-farr

gar pher leñ ye nazar kuchh apnī

tum ko na rahe ḳhabar kuchh apnī

ai aish-mahal ke rahne walo

dekho to kabhi nazar uTha kar

haal apne paDosiyon ka bhi kuchh

TuTe hue jhonpaDon ke andar

insan ki shakl mein bahaim

aulad-e-bashar giddhon se bad-tar

na-chaar-o-tabah-o-zar-o-bimar

ruswa-o-zalil-o-KHwar-o-abtar

faqon ki hai jin ke ruKH pe zardi

fikron se jo ho rahe hain laghar

kapDa nahin jin ke tan pe sabit

chadar hai na jin ke pas bistar

sukhi hui roTiyan bhi jin ko

milti nahin do do waqt aksar

dekhi nahin amn-o-afiyat ki

surat bhi jinhon ne zindagi-bhar

qismat mein nahin hai jin ki aaram

kolhu ka jo bail hain sarasar

lekin tumhein ghaaliban ye ek baat

malum nahin hai banda-parwar

sadqa hai unhin ki jutiyon ka

sari ye tumhaari shaukat-o-farr

gar pher len ye nazar kuchh apni

tum ko na rahe KHabar kuchh apni